Qytaıdyń ońtústiginde metılformıattyń aǵyp ketýinen segiz adam kóz jumdy

BEIJІŃ. QazAqparat – Gýııan qalasynda (Gýıchjoý provıntsııasynyń ákimshilik ortalyǵy, Ońtústik Qytaı) metılformıattyń aǵyp ketýi saldarynan keminde segiz adam kóz jumdy, taǵy úsh adam zardap shekti, dep habarlaıdy QazAqparat Qytaıdyń ortalyq telearnasyna silteme jasap.

Telearnanyń habarlaýynsha, senbi kúni jergilikti ýaqyt boıynsha saǵat 00:12-de Gýııannyń qoǵamdyq qaýipsizdik basqarmasyna qalanyń ekonomıkalyq jáne tehnologııalyq damý aımaǵynyń aýmaǵynda ishinde metılformıaty bar ydystardy túsirý kezinde jumysshylardyń bireýi esinen tanyp qalǵany týraly habar kelip túsken.

Aldyn ala tergeýge sáıkes, oqıǵa «Santsıansınsın» hımııalyq saýda kompanııasynyń ǵımaratynda bolǵan. Metılformıaty bar ydystardy túsirý kezinde kólik quralynan suıyqtyq aǵyp, saldary adam ólimine ákep soqqan.

Zardap shekkenderdiń barlyǵy medıtsınalyq mekemelerge jetkizildi. Oqıǵa ornynda ýly zattardy joıý jumystary júrgizilýde. Oqıǵanyń sebepteri anyqtalýda, tergeý amaldary júrgizilip jatyr.