Qytaıdyń ońtústiginde qonaqúı janynda jarylys boldy

BEIJІŃ. QazAqparat – Juma kúni Qytaıdyń ońtústigindegi Chjýhaı qalasynda (Gýandýn provıntsııasy) ornalasqan qonaqúıdiń janynda qýatty jarylys boldy. Qytaı Ortalyq teledıdarynyń habarlaýynsha, oqıǵa saldarynan kem degende úsh adam jaraqattandy.

Oqıǵa Doýmen aýdanynda jergilikti ýaqyt boıynsha saǵat 09:00-de oryn alǵan. Telearna málimetinshe, eki adam jeńil jaraqat aldy, taǵy bireýin kúıik shalǵan. Olar medıtsınalyq mekemelerge jetkizilgen. Tótenshe oqıǵaǵa gazdyń jarylýy sebep boldy.

Jarylys saldarynan jaqyn ornalasqan turǵyn úıler, saýda núkteleri men dúkender zardap shekti. Saǵat 10:00-degi jaǵdaı boıynsha órt sóndirýshiler tilsiz jaýdy aýyzdyqtaǵan. Oqıǵa ornynda 11 órt sóndirý quramy jumys istep jatyr, izdeý-qutqarý operatsııasy júrgizilýde.

Keleńsiz jaǵdaıdyń mán-jaıy anyqtalýda.