Qytaıdyń ońtústiginde bolǵan sý tasqynynan 175 adam qaza boldy
BEIJІŃ. Maýsymnyń 21-i. QazAqparat /Rýslan Súleımenov/ - Qytaıdyń ońtústiginde bolǵan sý tasqynynan 175 adam qaza bolyp, 107 adam iz-túzsiz joǵalyp ketti, dep habarlaıdy QHR Azamattyq ákimshilik mınıstrliginen.
Tabıǵattyń tosyn minezinen 25,15 mln. adam zardap shegip, 1,36 mln. gektar aýyl sharýashylyǵy jerleri búlindi. Qatty sý aǵynynan 144 myń úı buzyldy. Tabıǵat apaty oryn alǵan aımaqtan 1,71 mln. adam shyǵaryldy.
Qytaıdyń jaýapty vedomstvolarynyń esebine súıensek, tabıǵat apatynan kelgen ekonomıkalyq shyǵyn qazirgi ýaqytta 29,7 mlrd. ıýange (4,37 mlrd. AQSh dollary) jetti.
Keıbir provıntsııalarda sońǵy 50 jylda alǵash ret bolyp otyrǵan sý tasqynyna Qytaıdyń ońtústigindegi ózen-kólderdiń jańbyr sýynan erneýinen asyp, tasýy sebep bolyp otyr.
Qytaı premeri Ven Tszıabao maýsymnyń 19-20-sy kúnderi Gýansı-Chjýan avtonomııalyq aýdanyndaǵy Ýchjoý qalasyna ınspektsııalyq sapar jasap, oryn alǵan oqıǵamen tanysyp, sý tasqynymen kúrestiń tıimdiligin arttyrý jóninde nusqaýlar berdi.
