Qytaıdyń ońtústiginde 5 myń adamdyq halyqaralyq karantın ortalyǵy ashylady

BEIJІŃ. QazAqparat - Osy aıda Qytaıdyń ońtústigindegi Gýanchjoý qalasynda (Gýandýn provıntsııasy) 5 myń adamdyq halyqaralyq karantın ortalyǵy ashylady, dep habarlaıdy QazAqparat menshikti tilshisi.

Jergilikti BAQ-tyń habarlaýynsha, Gýanchjoýdaǵy halyqaralyq karantın ortalyǵy osy jyldyń qyrkúıek aıynyń sońynda paıdalanýǵa beriledi. Ortalyqtyń barlyq ǵımaratynyń qurylysy aıaqtalǵan, qazirgi ýaqytta nysan aýmaǵy abattandyrylyp jatyr. Keshenniń aýmaǵy 25 gektar, ol A, B, C, D dep tórt aımaqqa bólingen. Medıtsınalyq nysannyń 5 myń bólmesi bar. Buǵan deıin qytaılyq epıdemıolog Chjýn Nanshan málim etkendeı, Gýanchjoýdaǵy iri halyqaralyq karantın ortalyǵynyń qurylysy shetelden keletin týrısterge jáne epıdemıologııalyq qaýip joǵary aımaqtardaǵy jergilikti turǵyndarǵa arnalǵan. Sebebi, karantınge berilgen jergilikti qonaqúıler sanıtarlyq-epıdemıologııalyq normalarǵa saı kelmeıdi.

Eske salaıyq, Qytaıǵa keletin halyqaralyq reısterdiń 80-90%-y Gýanchjoýǵa qonady.