Qytaıdyń Korla qalasy - Shyńjańnyń basty kóliktik toraby

ShYŃJAŃ. QazAqparat - «QazAqparat» Halyqaralyq aqparat agenttiginiń Qytaıdaǵy menshikti tilshisi QHR Shyńjań-Uıǵyr avtonomııaly aýdanynyń Baıan-Gol-Mońǵol avtonomdy okrýgine (BMAO) baryp, óńirdiń ekonomıkalyq jáne mádenı turǵyda qalaı damyp kele jatqanyn kórip qaıtty.

Qazirgi ýaqytta BMAO aýmaǵy boıynsha Qytaıdyń eń úlken ákimshilik aýdany bolyp sanalady. Onyń quramyna 46 etnıkalyq top, atap aıtqanda mońǵoldar, handyqtar, qazaqtar jáne ózge de ulttar turyp jatqan segiz okrýg enedi.

Aımaqtyń astanasy - Korla qalasy. Qytaıda ony «Almurttar qalasy» dep te ataıdy. Osy óńirden almurttar shetelge, onyń ishinde Qazaqstanǵa da tasymaldanady.

Geografııalyq ornalasýynyń arqasynda jergilikti bılik qalany Shyńjańnyń basty kóliktik torabyna aınaldyryp, ony «Jibek jolynyń» ekonomıkalyq beldeýine ıntegratsııalaýdy kózdep otyr.

Aımaq munaı, hımııa jáne óńdeý ónerkásibi salasynyń arqasynda aıtarlyqtaı ósip keledi. Kóptegen kásiporyndar munda syrtqy naryqqa shyǵýdy, sonymen birge Ortalyq Azııa aımaǵyndaǵy birlesken jobalarǵa qarajat quıýdy kózdeıdi.

Osy qatarly kompanııalardyń biri - «Jinsheng». Atalmysh kompanııa Qazaqstanǵa ınvestıtsııa salý naryǵyna zertteý júrgizý maqsatynda Astanada mamyr aınynda keńse ashpaq.

Kompanııa keńesi tóraǵasynyń keńesshisi Hongtý Vangtyń aıtýynsha, qazaqstandyq naryqty zertteý jumysy jyldyń sońyna deıin aıaqtalyp qalýy kerek. Osydan keıin Qazaqstannyń hımııa salasyna qanshalyqty qarjylyq ınvestıtsııa quıý kerektigi aıqyndalady.