Qytaıdyń Qorǵas qalasynan 5 000-ǵa jýyq jankúıer 2017-jylǵy Ýnıversıadany kórýge kele alady
ALMATY. QazAqparat- Qytaıdyń Qorǵas qalasynan 5000-ǵa jýyq týrıst Almatyǵa 2017-jylǵy Ýnıversıada oıyndaryn tamashalaýǵa keledi. Bul týraly «Almaty qalasynyń halyqaralyq sporttyq jobalar dırektsııasy» Memlekettik qory ókilderimen bolǵan kezdesýde Qorǵas qalalyq Týrızm basqarmasynyń basshysy Van Shýlın hanym málimdedi, - dep habarlaıdy búgin Dırektsııanyń baspasóz qyzmetinen.
Van Shýlın hanymnyń aıtýynsha, Qorǵas qalasynyń týrızm basqarmasy Almatyda ótetin 28-shi búkilálemdik Ýnıversıadaǵa barynsha kóp adam aparý úshin iri marketıngtik joba jasamaq nıette.
«Biz Qorǵas halqyna, 2017 jylǵy Ýnıversıadany barynsha tanytqymyz keledi. Byltyr biz shetelge 18000-ǵa jýyq týrıst shyǵarǵanbyz. Buǵan arnaıy marketıngtik naýqannyń arqasynda qol jetkizdik. Endi biz Almatydaǵy Ýnıversıada oıyndaryna barynsha kóp týrıst aparý úshin tynbaı eńbek etetin bolamyz. Aıta keteıin, marketıngtik kompanııany júrgizý - ishki qarjymen qamtamasyz etiledi. Ýnıversıada uıymdastyrý komıteti tarapynan shyǵyn bolmaıtynyn aıta ketken jón»,- dedi Van Shýlın hanym.
Aıta ketelik, Ýnıversıadanyń týrısttik múmkindigi qazir Almatyda ótip jatqan «KITF-2016» kórmesinde kórsetildi. Onda Ýnıversıadany uıymdastyrýshy komıtet, týrısterdi qabyldaý múmkindikteri jaıly tolyqqandy málimet berdi.
«Almatydaǵy 28-shi búkilálemdik Ýnıversıada oıyndarynyń bastalýyna bir jyldan az ýaqyt qaldy. Biz qalamyzǵa 30 000-ǵa jýyq týrıst keledi dep kútip otyrmyz. Qazir biz qazaqstandyq iri týrıstik kompanııalarmen birge 2017 jylǵy Ýnıversıadanyń týr-paketin jasap jatyrmyz. Sondaı-aq, Megapolıstiń qonaqtary úshin vızalyq jumystardy jeńildetý, týrısterdi qonaq úılerge jaıǵastyrý jáne jarys bıletterin taratýdy retteý máseleleri qarastyrylyp jatyr»,- dedi kezdesý barysynda Dırektsııa basshysynyń orynbasary Dastan Seıitqazın.
