Qytaıdyń «kókshil qoıany» tirildi
ASTANA. QazAqparat - Qytaıdyń «Kókshil qoıan» (ıÝıtý) atty apparaty Aı betindegi jumysyn qalpyna keltirdi. Bul týraly jergilikti buqaralyq aqparat quraldary habarlaǵan.
Qytaılyq BAQ aı baǵdarlamasyn júzege asyrýǵa jaýapty qurylymnyń ókili Peı Chjaoıýnyń: «Ol tiri! Endi eń quryǵanda ony qutqaryp alýǵa múmkindik bolady. Ol tirildi!» degen sózin jarysa jazýda.
Eske sala keteıik, Aı betine 2013 jyldyń 14 jeltoqsanynda jetkizilgen «Kókshil qoıan» 25 qańtarda «aıdaǵy túnniń» bastalýyna oraı «uıqy rejımine» aýysýy kerek bolatyn. Alaıda bul rejım iske qosylmap edi. Aıdaǵy tún shamamen bizdegi 14 táýlikke sozylatyndyqtan «Kókshil qoıan» osy ýaqyt aralyǵyn shtattyq rejımde kótere almaıtyny aıtylǵan bolatyn. Keıinnen, aqpannyń 10-ynda Aıdaǵy kún bastalysymen apparat «til» qatpaǵan. Mamandar «Kókshil qoıan» túndi kótere almady dep topshalaǵan. Peı Chjaoıýı da «Biz osy «aıdaǵy tún» barysynda ol tym tómengi temperetýrany kótere almaýy múmkin dep qobaljyǵan bolatynbyz», - deıdi.
Mamandardyń sózine qaraǵanda, qazir «Kókshil qoıan» dabyldardy qabyldaýǵa qaýqarly bolyp otyr. Onyń jumysynda biraz aqaýlar bolǵanyna qaramastan qytaılyq mamandar «biz ony qutqaramyz» dep baryn salýda.
Eske salatyn jaıt, «Kókshil qoıan» apparaty alǵashqy fotosýret jáne vıdeomaǵlumattaryn jiberip úlgerdi. Aıtpaqshy apparatqa berilgen osy ataý ınternet arqyly daýys berý nátıjesinde tańdaldy jáne ol qytaılyq folklorǵa negizdelgen kórinedi. Atalǵan qondyrǵy buryshy 30 gradýs qıǵashtyqtaǵy tóbeshikterge shyǵa alady, sondaı-aq onyń jyldamdyǵy saǵatyna 200 metrge deıin jetip otyr. Aıdy zertteý boıynsha qytaılyq mıssııa úsh kezeńdi qamtydy. Onda Aıdyń orbıtasyna shyǵý, onyń betine qoný jáne qaıtadan Jerge oralý mindeti qoıylyp otyr.
