Qytaıdyń kedendik statıstıkasymen alshaqtyq qysqardy - mınıstr

NUR-SULTAN. QazAqparat – Qytaı Halyq Respýblıkasynyń kedendik statıstıkasymen aradaǵy alshaqtyq qysqardy. Bul týraly Májilistiń jalpy otyrysynda QR Úkimetiniń 2020 jylǵy respýblıkalyq bıýdjettiń atqarylýy týraly esebin talqylaý kezinde QR Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Jıi kóterilip júrgen máseleniń biri – ol Qytaı Halyq Respýblıkasynyń kedendik statıstıkasymen aradaǵy alshaqtyqqa qatysty. Álemdik tájirıbede syrtqy saýda statıstıkasyndaǵy osyndaı alshaqtyqtar kóptegen elderge tán. Mysaly, 2019 jyly Qytaı Halyq Respýblıkasy men Amerıka Qurama Shtattary arasyndaǵy syrtqy saýda derekteriniń sáıkessizdigi 50 mlrd dollardan astam bolsa, Germanııamen - 45 mlrd dollardy qurady. Barlyq Eýrazııalyq ekonomıkalyq odaq elderinde de Qytaı Halyq Respýblıkasymen osyndaı problemalar bar», - dedi E. Jamaýbaev.

Osy oraıda Qazaqstan men QHR arasyndaǵy kórsetkishterge túsinik berdi.

«Bizdiń jaǵdaıǵa kelsek, statıstıkadaǵy alshaqtyqtyń aıtarlyqtaı bóligi Qytaı tarapynyń bizdiń elimiz arqyly taýarlar tranzıtiniń edáýir bóligin ózderinde Qazaqstanǵa eksport retinde esepke alýymen baılanysty. Sonymen qatar, Qytaıdan shyǵatyn taýarlar baǵasy kótermelenip kórsetiledi, al bizge kelgende kásipkerler kerisinshe tómendetýdi kózdeıdi. Degenmen qabyldanǵan sharalar úsh jyldyń ishinde alshaqtyq mólsherin 60 paıyzdan 45 paıyzǵa deıin qysqartýǵa múmkindik berdi. Osy baǵyttaǵy jumys jalǵasýda», - dedi mınıstr.