Qytaıdyń Qazaqstannyń munaı salasyndaǵy úlesi 24 paıyzdy qurap otyr - U. Qarabalın
ASTANA. 26 qyrkúıek. QazAqparat - Qytaıdyń Qazaqstannyń munaı salasyndaǵy úlesi 24 paıyzdy qurap otyr.
Búgin QR Parlamenti Senatynyń jalpy otyrysynda QR Munaı jáne gaz mınıstri Uzaqbaı Qarabalın osylaı málim etti. Eske salsaq, palata otyrysynda senatorlar «Qazaqstan men Qytaı arasyndaǵy «Qazaqstan - Qytaı» munaı qubyryn damytý jáne paıdalaný kezindegi yntymaqtastyqtyń keıbir máseleleri týraly kelisimdi ratıfıkatsııalaý týraly» zań jobasyn talqylaǵan bolatyn.
Munaı jáne gaz mınıstriniń aıtýynsha, búgingi tańda Qazaqstannyń munaı óndirisi salasyndaǵy Qytaı Halyq Respýblıkasynyń úlesi 24 paıyzdy quraıdy. «Alaıda, qytaıdyń negizgi munaı kompanııalary Qyzylorda, Atyraý oblystaryndaǵy ken oryndarynda jumys istep jatyr jáne ol kenishterde jylma-jyl munaı óndirý tómendep keledi. Sondyqtan da, aldaǵy ýaqytta QHR úlesi 7-8 paıyzǵa deıin kemýi múmkin», - deıdi U. Qarabalın.
Onyń aıtýynsha, Qazaqstannyń munaı salasyna quıǵan ınvestıtsııasy boıynsha AQSh kompanııalary alda tur jáne olardyń úlesi 25 paıyzdy qurap otyr.
