Qytaıdyń iri megapolısterinde koronavırýsqa baılanysty sabaq toqtatylady

BEIJІŃ. QazAqparat - Qytaıdyń ońtústigindegi Gýandýn provıntsııasynyń Gýanchjoý qalasyndaǵy mektepter dúısenbiden bastap oqytýdy toqtatady. Bul shekteýler koronavırýstyń taralýyn tejeý maqsatynda qabyldandy, dep habarlaıdy QazAqparat tilshisi.

«11 sáýirden bastap Qytaı megapolısindegi bastaýysh jáne orta mektep oqýshylary qashyqtan oqytýǵa kóshedi», - delingen jergilikti bılik ókilderiniń málimdemesinde.

Sonymen qatar, qaladaǵy mektepten tys bilim berý uıymdarynda kúndizgi bólimde sabaqtar bolmaıdy. Joǵary oqý oryndary jabyq basqarý rejımine aýystyrylýda. Balalardy balabaqshalarǵa qabyldaý da júrgizilmeıdi. Ákimshilik jergilikti turǵyndardy Gýanchjoýdan orynsyz ketpeýge shaqyrady.

Ótken demalys kúnderi megapolıste halyqty kovıdke testileýdiń jappaı qalalyq naýqany bastaldy. Dúısenbidegi jaǵdaı boıynsha 19 mıllıonnan astam turǵyn PTR synaqtarynan ótti.

Resmı málimetterge sáıkes, ótken táýlikte Gýanchjoýda koronavırýs ınfektsııasyn juqtyrýdyń 22 jaǵdaıy anyqtaldy. Megapolıs bıligi COVID-19 juqtyrǵan naýqastarǵa arnalǵan ýaqytsha aýrýhananyń qurylysyn aldyn ala bastady.