Qytaıdyń iri ákimshilik aımaǵynda karantın sharalary kúsheıtildi

BEIJІŃ. QazAqparat – COVID-19 indetine baılanysty Ońtústik-Shyǵys Azııadaǵy eń iri qumar oıyn ortalyǵy sanalatyn Qytaıdyń Makao arnaıy ákimshilik aımaǵynda karantındik sharalar kúsheıtildi. Bul týraly QazAqparat menshikti tilshisi habarlaıdy.

Beısenbiden bastap Makaoda oıyn-saýyq oryndary, sonyń ishinde kınoteatrlar men teatrlar jabyldy. Meıramhanalar men qoǵamdyq tamaqtaný oryndary tek jetkizý jáne alyp ketý qyzmetteri arqyly jumys isteıdi.

Jergilikti koronavırýspen kúresý jáne úılestirý ortalyǵynyń málimeti boıynsha, 25 maýsymǵa deıin PTR synaqtarynan ótpegen Makao turǵyndaryna «densaýlyq kodynyń» sary belgisi beriledi. Erejege sáıkes, sary tústi «QR kody» bar adamdarǵa qoǵamdyq oryndarǵa kirýge tyıym salynýy, qoǵamdyq kólikti paıdalanýyna jáne ákimshilik aýmaqtan shyǵýyna tyıym salynýy múmkin.
25 maýsymnan jergilikti bılik Makao turǵyndaryn koronavırýsqa qarsy antıgenge tekserý naýqanyn bastaıdy.