Qytaıdyń Іle qazaq avtonomııaly oblysy da tabıǵat apatynan japa shegýde
ASTANA. Aqpannyń 24-i. QazAqparat /Rızabek Núsipbekuly/ - Qytaıdaǵy Іle qazaq avtonomııaly oblysynda jańbyr aralas jaýǵan qardyń saldarynan myńnan artyq turǵyn úı qulady,
dep habarlaıdy QazAqparat qytaıdyń «Táńirtaý» saıtyna silteme jasap.
Shynjań Іle ózeni alabyndaǵy aýanyń temperatýrasy sońǵy kúnderi kúrt jylynyp, jaýyn-shashyn mol tústi. Jergilikti úkimettiń sanaǵyna qaraǵanda, aqpannyń 23-inde túske deıin Іle ózeni alabyndaǵy 5 aýdan-qaladaǵy 27 myń 108 adam zardap shegip, 1 myń 179 turǵyn úı qıraǵan, al 13 myńnan artyq úı jaramsyz. Aýa raıynyń qolaısyzdyǵynan ushaqtar keshiktirilip, Keńsaı bóligindegi qatynas ýaqytsha shekteldi.
Aýa raıyn boljaý ortalyǵynyń derekterine qaraǵanda, Іle ózeni alabyndaǵy jaýyn-shashyn mólsheri jyldaǵydan úsh esege artqan. Jergilikti úkimet apatqa ushyraǵandardy qaýipsiz orynǵa kóshirip, materıaldyq kómek berýde.
