Qytaıdyń Hebeı provıntsııasynda nóser jaýynǵa baılanysty 1,2 mıllıon adam evakýatsııalandy

BEIJІŃ. QazAqparat – Qytaıdyń soltústigindegi Hebeı provıntsııasynda nóser jaýynǵa baılanysty 1,2 mıllıonnan astam adam evakýatsııalandy. Bul týraly QazAqparat Sınhýa aqparat agenttigine silteme jasap habarlaıdy.

3 tamyzdaǵy jaǵdaı boıynsha, Hebeı provıntsııasynda 1,23 mln adam qonys aýdardy, sonyń ishinde 857,2 myń adam - sý tasqyny bolǵan aımaqtardyń turǵyndary.

27 shildede «Doksýrı» taıfýny Hebeı provıntsııasynyń kóp bóligin qamtydy. Bul provıntsııadaǵy jaýyn-shashynnyń ortasha mólsheri 146 mm-den asty, ásirese 600 myń halqy bar Chjýochjoý qalasy zardap shekti. Bul eldi mekende jaýyn-shashynnyń ortasha mólsheri shamamen 400 mm boldy.
Jergilikti BAQ-tyń habarlaýynsha, osy provıntsııadaǵy sý rezervýarlary men tundyrmalarda tasqyn sý bir aptadan bir aıǵa deıingi ýaqytta sheginedi dep kútilýde.
Hebeı provıntsııasynda jaýǵan jaýyn-shashynnyń jalpy kólemi 27,5 mlrd tekshe metrge jetti. Bul provıntsııadaǵy barlyq iri jáne orta sý qoımalarynyń jalpy syıymdylyǵynan eki ese kóp.
Qazirgi ýaqytta Hebeıde 100 myńnan astam qutqarýshy jumys isteýde.
Provıntsııanyń Tótenshe jaǵdaılar basqarmasynyń málimetinshe, 29 shildeden 1 tamyzǵa deıin qatty jańbyrdan týyndaǵan sý tasqyny saldarynan 94 ýez men aýdan, sondaı-aq Hebeı provıntsııasyndaǵy 826 kent zardap shekti. Keltirilgen ekonomıkalyq zalaldyń esebi júrgizilýde.
«Doksýrı» taıfýny Qytaıdyń soltústik-shyǵysyna qaraı jyljydy, onda qatty jańbyr jaýyp tur.