Qytaıdyń Eýropaǵa jóneltken sálemdemeleri Qazaqstan arqyly jetkizilýi múmkin
ASTANA. QazAqparat - «Qazposhta» halyqaralyq sálemdemelerdi jetkizýde jyl saıyn 88 paıyz ósim kórsetýde. Bul týraly búgin elordada ótken Táýelsiz ál-aýqat qorlary halyqaralyq forýmynyń (IFSWF) 9-shy otyrysynda «Qazposhta» AQ-nyń basqarma tóraǵasy Sáken Sársenov málim etti, dep habarlaıdy QazAqparat.
«Eń aldymen álemde elektrondyq kommertsııa naryǵyn óte jyldam qarqynmen damyp otyr jáne Qytaı ósim núktesi sanalatyndyǵyn aıtqym keledi. Elektrondyq kommertsııa naryǵynyń 40 paıyzdan astamy Qytaıda jasalatyndyǵyn bilemiz. Sondyqtan «Bir beldeý, bir jol» Qazaqstan úshin mańyzdy joba sanalady. Óıtkeni, Qytaıdyń elektrondyq kommertsııa ónimine álemniń kóptegen elderi qyzyǵýshylyq tanytýda. Jyl saıyn Qytaıdan Reseıge qaraı 2 mln, al Eýropaǵa qaraı shamamen mıllıon sálemdeme jiberiledi. Kórshi Ózbekstanda da óte jaqsy reformalar júrgizilip jatyr. Menińshe, taıaý ýaqytta bul naryq ashylady. Bul 30 mıllıondyq úlken naryq jáne elektrondyq kommertsııa naryǵy úshin tartymdy», - dedi ol.
Onyń aıtýynsha, Alı baba kompanııasynyń baǵalaýynsha, 2020 jylǵa qaraı Qytaıdan Eýropaǵa jyl saıyn 800 mln sálemdeme tasymaldanatyn bolady.
«Mine dál osy jaıt bizdiń kompanııada qyzyǵýshylyq týdyrady. Óıtkeni, teńizben tasymaldaý uzaq ýaqytty alsa, ushaqpen jetkizý qymbat. Sonda temirjol men avtomobıl joly qalady. Al bul oraıda bizdiń elimizdiń perspektıvasy óte jaqsy. Sebebi biz arqyly Qytaıdan Reseı, Eýropaǵa deıin - eń qysqa jol. Biz jyl saıyn halyqaralyq poshta boıynsha 88 paıyzǵa ósip kelemiz. Bul óte jaqsy dınamıka», - dedi Sársenov.
Onyń aıtýynsha, qazirgi ýaqytta elektrondyq kommertsııa naryǵynyń jetkizilýi 35 táýlikti quraıdy. Taıaý ýaqytta ony 10 kúnge, odan keıin 3 kúnge deıin qysqartýǵa múmkindik bar.
