Qytaıdyń eń úlken Taklamakan shólinde kólshikter paıda boldy

BEIJІŃ. QazAqparat - Qytaıdyń Shyńjań Uıǵyr avtonomııalyq aýdanynda (ShUAR) ornalasqan Taklamakan shólinde kóptegen kólshikter paıda boldy, dep habarlaıdy QazAqparat tilshisi CCTV arnasyna silteme jasap.

CCTV habarlaýynsha, Qytaıdyń eń úlken shólindegi kólder Tarym ózeninde sońǵy 10 jyldaǵy eń úlken sý kólemi tirkelgennen keıin paıda boldy, nátıjesinde sý tóbelerge aǵyp ketti.

Shyńjań sý sharýashylyǵy basqarmasynyń málimetinshe, mamyr aıynyń aıaǵynan qyrkúıek aıynyń sońyna deıin Tarym ózeniniń bastaýyndaǵy aǵyn sý burynǵy jyldardaǵy osy kezeńmen salystyrǵanda 1,5 ese artqan.

Bul 1957 jyly ólsheý júrgizilgennen bergi eń qýatty aǵyn boldy.

QHR resýrstary mınıstrliginiń málimdemesine sáıkes, bıyl jazda Qytaıda bolǵan aptap ystyq Shyńjań muzdyqtarynyń erip, sý tasqynyna aınalýyna sebep boldy.

Bıyl Tarym ózeniniń negizgi aǵysyndaǵy sý tasqyny mamyr aıynan bastap qatarynan 80 kúnge jalǵasty.

Taklamakan shóli 337 myń sharshy km aýmaqty alyp jatyr. Jaýyn-shashynnyń jyldyq ortasha mólsheri ádette 100 mıllımetrden aspaıdy.

Tarym - Taklamakan shóliniń soltústik shekarasymen aǵyp ótetin Qytaıdaǵy eń uzyn ishki ózen.

Foto: eco.cctv.com