Qytaıdyń birneshe qalasynda koronavırýs órshidi
BEIJІŃ. QazAqparat – Beıjińge kórshiles jatqan Hebeı provıntsııasynyń úsh qalasyndaǵy 22 mıllıonnan astam turǵyn koronavırýstyń qaıta órshýine baılanysty oqshaýlandyryldy, dep habarlaıdy «QazAqparat» HAA menshikti tilshisi.
Hebeı provıntsııasynda COVID-19-dyń órshýine baılanysty Shıtszıachjýan, Sıntaı jáne Lanfan qalalary oqshaýlandyryldy. Bul shaharlarda turatyn halyq sany 22 mıllıonnan asady.
Qytaıda 2021 jyldyń basynan koronavırýstyń jańa jaǵdaılary kúrt artty. Іndetti eń kóp juqtyrǵandar Shıtszıachjýan qalasynda tirkeldi. 11 mıllıon turǵyny bar Shıtszıachjýanda seısenbiden bastap halyqty jappaı testileýdiń ekinshi kezeńi bastaldy.
Qytaı bıligi Hebeı provıntsııasynyń basqa qalalarynyń turǵyndaryna Beıjińge barmaýǵa keńes berip otyr.
Jalpy, bıylǵy jyldyń 2 qańtarynan bastap Hebeı provıntsııasynda koronavırýs 400-den astam adamda rastalǵan jáne 200-den astam sımptomsyz tasymaldaýshy anyqtalǵan.
