Qytaıdyń bilikti dárigerleri Qazaqstanǵa kelmek
Quramyna koronavırýs ınfektsııasynyń aldyn alý jáne koronavırýsqa shaldyqqan naýqastardy emdeýde tájirıbesi mol joǵary bilikti dárigerler kiretin Qytaı delegatsııasynyń mıssııasy - qazaqstandyq medıtsına qyzmetkerlerine COVID-19 qarsy kúreste konsýltatsııalyq ádistemelik kómek kórsetý, onyń ishinde COVID-19 aldyn alý jáne baqylaýdyń Qytaı tájirıbesimen, jaqyn baılanystardy anyqtaý jáne oqshaýlaý tetikterimen tanysý, qoldanystaǵy klınıkalyq emdeý hattamalaryna usynystar berý jáne t.b.
Bul bastamany Qazaqstan tarapy osy jyldyń 24 naýryzynda Memleket basshysy Q-J. Toqaevtyń Qytaı Halyq Respýblıkasynyń (QHR) Tóraǵasy Sı Tszınpınmen COVID-19 jańa koronavırýs ınfektsııasyna qarsy kúreste QHR-nyń Qazaqstanǵa jan-jaqty qoldaý kórsetýi týraly telefon arqyly sóılesý barysynda qol jetkizilgen ýaǵdalastyqty júzege asyrý maqsatynda usyndy.
Dıplomatııalyq arnalar arqyly qytaılyq sarapshylardy Qazaqstanǵa jiberýdi uıymdastyrý máselelerin sheshýge qatysty ekijaqty kelissózder júrgizilýde.
Búgin 7 sáýirde QR densaýlyq saqtaý vıtse-mınıstri L.M.Aqtaevanyń tóraǵalyǵymen QHR densaýlyq saqtaý komıteti ókilderi men qytaılyq dárigerlermen onlaın kezdesý ótti.
Kezdesýge Qazaqstan tarapynan QR densaýlyq saqtaý vıtse-mınıstri K.Nadyrov, QR Densaýlyq saqtaý mınıstrliginiń jaýapty hatshysy B.Jaqselekova, Nur-Sultan, Almaty, Qaraǵandy qalalaryndaǵy medıtsınalyq JOO rektorlary, Nur-Sultan, Almaty qalalary men Qaraǵandy oblysynyń densaýlyq saqtaý basqarmasynyń basshylary, sondaı-aq QR Syrtqy ister mınıstrliginiń ókilderi qatysty.
Qytaı tarapynan Chjan Ganchan myrza – Qytaıdyń Shyńjań-Uıǵyr avtonomııalyq ólkesi (ShUAÓ) Densaýlyq saqtaý komıtetiniń ınspektory, He Shaohýa myrza – Qytaı densaýlyq saqtaý komıteti Halyqaralyq yntymaqtastyq departamenti dırektorynyń orynbasary, qytaılyq dárigerler, Qytaıdyń Syrtqy ister mınıstrligi men QR-daǵy QHR Elshiliginiń ókilderi qatysty.
Osy onlaın kezdesý barysynda taraptar 13 mamannan turatyn qytaılyq delegatsııanyń Qazaqstanǵa saparynyń baǵdarlamasyn, yntymaqtastyqtyń basym baǵyttaryn, COVID-19 taqyryby boıynsha qazaqstandyq dárigerlerge arnalǵan trenıng taqyryptaryn, logıstıka máselelerin jáne t.b. keńinen talqylady. Delegatsııa quramynda pýlmonologııa, ınfektsııa, shuǵyl terapııa, epıdemıologııa, qoǵamdyq densaýlyq saqtaý jáne t.b. sala mamandary bar.
QHR dárigerleri sáýirdiń basynda Nur-Sultanǵa arnaıy uıymdastyrylǵan ushaqpen ushyp keledi. Sonymen qatar delegatsııamen birge Qytaıdan gýmanıtarlyq kómektiń ekinshi bóligi de jetkiziledi dep kútilýde.