Qytaıdyń «Basty jańalyqtar» áleýmettik jelisinde Sı Tszınpın sapary men onyń marapaty keńinen talqylandy
Atalǵan áleýmettik platformada Qytaı Halyq Respýblıkasynyń Tóraǵasy Sı Tszınpınniń sózine silteme jasaı otyryp, buǵan deıin onyń Qazaqstanǵa 5 jyl buryn barǵany aıtylady.
«Beıjiń qysqy olımpıadasynan keıin Prezıdent myrzamen qaıta kezdeskenime qýanyshtymyn. Bes jyldan keıin kórkem Qazaqstanǵa taǵy da saparlaı kelýim aıryqsha jyly sezimge bóledi. Bul meniń pandemııa bastalǵannan beri shetelge jasaǵan alǵashqy saparym. Men Qazaqstandy tańdadym. Bul qytaı-qazaq qatynasynyń joǵary deńgeıi men ereksheligin, bizdiń dostyǵymyzdyń tereńdigin kórsetedi», - degen QHR Tóraǵasy.
Sondaı-aq, kórshi memleket basshysynyń Qazaqstandy Ortalyq Azııadaǵy úlken memleket ekenin jáne Eýrazııa aımaǵynda mańyzdy yqpaly bar el ekenin atap ótkeni aıtylady.
«Men Qytaı Úkimetiniń Qazaqstanmen aradaǵy qatynasyna erekshe nazar aýdaratynyn naqty aıta alamyn. Halyqaralyq jaǵdaı qalaı ózgerse de, Qytaı árqashan Qazaqstannyń táýelsizdigin, egemendigi men aýmaqtyq tutastyǵyn saqtaýyna qoldaý kórsetedi. Prezıdent myrzanyń turaqtylyq pen damýdy qamtamasyz etý maqsatymen júrgizip jatqan reformalaryn berik qoldaıdy. Qazaqstannyń ishki isine kez kelgen kúshterdiń aralasýyna tabandy túrde qarsy turady. Qytaı árqashan Qazaqstannyń senimdi dosy ári seriktesi bolyp qala beredi», - degen Sı Tszınpın.
Jeli platformasynda Qytaı Tóraǵasyna tabystalǵan marapaty da talqylanyp jatyr.
«Juldyzdy tósbelgi ordeni altynnan jasalǵan. Pishini negizinen alqa ordenimen uqsas. Aıyrmashylyǵy – bes buryshty, altyn tústi ordenniń tómengi bóligindegi juldyzdyń «sáýlesi» qanyq árlengen. Bul orden keýdeniń sol jaǵyna taǵylady», -dep sıpattalǵan.
«Tóraǵa Sı Tszınpın Nur-Sultan qalasynda QR Prezıdenti Toqaevtan «Altyn Qyran» ordenimen marapattaldy» degen taqyryppen jarııalanǵan aqparatta «Altyn Qyran» ordeni Qazaqstannyń eń joǵary qurmetti marapaty ekeni aıtylady.
Bul marapattyń 1995 jyly bekitilgenin, onyń Qazaqstan memlekettiliginiń qurylýyna eleýli úles qosqan kórnekti tulǵalarǵa, sonyń ishinde Qazaqstanmen syrtqy dostyq qarym-qatynasta oń nátıjelerge qol jetkizýge yqpal etken shetel memleket basshylaryna tabystalatyny aıtylǵan.
Platformada keńinen talqylanǵan taqyrypta«Altyn Qyran» ordeniniń dızaıynynda qandaı mán bar?», - delingen.
«Orden juldyzdy jáne ilmekti alqalyq bolyp ekige bólinedi. Іlmekti alqalyq ordeni Qazaqstannyń memlekettik Eltańbasynyń pishininde jasalǵan. Salpynshaǵynda memlekettik Týdyń elementi – kún astyndaǵy qyran beınelengen. Ordenniń negizgi bólshegi altynnan jasalyp, juldyz pishinde quıylǵan. Ár buryshtyń altyn jıekteri «klýazon emal» ádisimen jasalǵan. Ordenniń qaq ortasynda altyn qyran beınelengen. Artqy kórinisi kók boıaýmen, aınalasy aq altynmen kómkerilgen», - degen sıpattama berilgen.
