Qytaıdyń Altaı qalasynda qazaqsha kúresten Azııa chempıonaty óz máresine jetti (FOTO)
ASTANA. QazAqparat - Qazaq kúresiniń qadamy búgingi tańda qaryshtaı túsýde. Onyń aıǵaǵy osy ata kúresimizden ótip jatqan álem, Eýropa jáne Azııa saıystary bolyp tabylady. Mine, tól kúresimizden taǵy bir súıinshi habar Qytaıdyń Shyńjań uıǵyr avtonomııaly ólkesine qarasty Altaı qalasynan kelip jetti.
19 memlekettiń sportshylary qatysýmen ótken 11-shi retki qurlyqtyq dodaǵa 60 jáne 70 keli salmaqta jerlesterimiz Qýanysh Ysqaqov pen Qýanysh Sábıtov top jarsa, 80 kelide bas júldeni qytaılyq qandasymyz Amanjol Úsentaı qanjyǵasyna baılady. Bul týraly QR Ulttyq sport túrleri qaýymdastyǵynyń baspasóz qyzmetinen habarlady .
Jerlesimiz Ǵanı Seıdildaev túıe palýan atanyp, altynnan alqa taqty. Sonymen ulttyq quramamyzdyń qorjyny 8 medalǵa tolyqty. Onyń beseýi altyn, ekeýi kúmis jáne bireýi qola medal.
Eske sala keteıik Azııa chempıonaty Qytaı jerinde ekinshi ret ótkizilip otyr. Osydan bir jyl buryn Gansý provıntsııasyna qarasty Aqsaı qazaq aýdanynda ótken bolatyn. Kelesi Álem chempıonaty da sonda bolady dep josparlanýda. Bul jolǵy kezdesýde jalpy esep boıynsha Qazaqstan birinshi oryndy ıelendi.
