Qytaıdyń áleýmettik jelilerinde Dımashqa arnalǵan óleń-jyrlar taraı bastady
ASTANA. QazAqparat - Qytaıdyń Chańsha qalasynda ótip jatqan «Singer 2017» án baıqaýynyń birinshi jáne ekinshi kezeńderinde jeńiske jetken jerlesimiz Dımash Qudaıbergenovke aqyndar jyr arnaı bastady, dep habarlaıdy QazAqparat.
Mıllıardtan astam halqy bar Qytaıdy ónerimen tánti etip, tamsandyrǵan Dımashqa arnaý óleńderdiń biri keńinen tanymal WeChat áleýmettik jelisi arqyly taraýda. «Maqtanysh» dep atalatyn óleńniń avtory - Ómir Aýǵanbaı.
Eske salaıyq, osy kúnderi Qytaıdyń Hunan TV basty oıyn-saýyq telearnasynda «I am a Singer-2017» mýzykalyq shoýy ótýde. Oǵan qatysyp jatqan Dımash Qudaıbergenov birinshi kezeńde eń qıyn ánderdiń biri «SOS d'un terrien en détresse» kompozıtsııasyn, 28 qańtar kúni ótken ekinshi kezeńinde reseılik Vıtastyń «Opera №2» ánin oryndap, qos saıysta jeńiske jetti.
Maqtanysh
Ýa ǵajap, perisiń be, pendesiń be? !
Perisiń ǵoı sebep joq, senbesime...
Qandaı uly qasıet, seni ákelgen
Bir mıllard halyqtyń kómbesine.
Qandaı myqty jan ediń, ǵajap úniń,
Ádemisi-aı, aı dıdar ajaryńnyń
Aq júzińnen tamǵany-aı taza nurdyń,
Baq juldyzy janǵany-aı qazaǵymnyń!
Aıtshy tezden, qazaqtyń baq juldyzy,
Bilgeı jatyr jaıyńdy jerdiń júzi.
Múmkin seniń ákeshiń peri jigit,
Al anashyń, talassyz hordyń qyzy.
Kelbet mynaý, keremet daýys anaý,
Pendege ortaq sulýdy "baǵy sanaý ".
Júz mıllıon jigittiń ishi kúıip,
Júz mıllıon sulý qyz jabysady-aý.
Has tulparym, Hýnanda qýdy namys,
Jetti, jeńdi, jasasyn bul qýanysh.
Qazaqtyń talantyna tórin bergen,
Meımandos mıllıardqa myń bir alǵys.
Ózi án salǵan, qonaqqa án saldyrǵan,
Qaı qazaqtyń úıine barsań - dýman!
Beıbit eldiń aınaldym bedelinen,
Jas ulany jalǵandy tamsandyrǵan.
Talaı pende taleısyz jaratyldy-aý,
Násip bolyp ánińdi ǵana tyńdaý.
Sáýletińe súıingen sansyz adam,
Nege qazaq bolmaǵam dep ókindi-aý...
Qazaqpyn, maqtanamyn taza qanym,
Tyńdap turyp Dımashtyń ǵajap ánin.
Alyp álem aldynda aıdyndanyp,
Qandasyma quttyqtaý jaza alamyn.
Jer betinde bolsada túrli oı, túrli el,
Biz qazaqpyz, bilip al bilmeıtinder.
Súıikti etsin bir Alla bizdi álemge,
Kúıip ketsin qazaqty kúndeıtinder.
Dımash, seni bar qazaq qylsyn uran,
Daýysyńmen tarasyn nur shuǵylań.
Alla seniń únińe dert bermesin,
Saqtasyn dos-dushpannyń til suǵynan! ! !
