Qytaıdy zertteý ortalyǵynda «Úsh D» jahandyq dıalog máselesi talqylandy
Memlekettik organdardyń, taldaý ortalyqtarynyń, ýnıversıtetter men buqaralyq aqparat quraldary ókilderiniń qatysýymen ótken jıynda «Bir beldeý, bir jol» halyqaralyq yntymaqtastyq jónindegi joǵary deńgeıli ekinshi forýmnyń mańyzdylyǵy men qorytyndylary talqylandy.
Eske salsaq, ótken sáýir aıynda Beıjiń qalasynda «Bir beldeý, bir jol» bastamasy aıasynda halyqaralyq yntymaqtastyq jónindegi joǵary deńgeıli Ekinshi forým ótken bolatyn. Forýmda is-sharaǵa qurmetti qonaq retinde qatysqan QR Tuńǵysh Prezıdenti - Elbasy Nursultan Nazarbaev Qazaqstannyń zamanaýı Jibek jolyn qurý máselesi jónindegi kózqarasyn jetkizip, birqatar strategııalyq bastamalar men jańa usynystardy alǵa tartty.
Nur-Sultan qalasyndaǵy sarapshylyq is-sharanyń ashylýynda sóz sóılegen QR Syrtqy ister mınıstrligi Halyqaralyq aqparat komıtetiniń tóraǵasy Tımýr Shaımergenov Beıjińde ótken forýmnyń mańyzdy qorytyndylarynyń qatarynda QR Tuńǵysh Prezıdenti - Elbasy usynǵan «Úsh D» bastamasyn erekshe atap ótti.
Spıkerdiń aıtýynsha Elbasy kótergen bastamanyń aǵymdaǵy halyqaralyq ahýaldaǵy ózektiligi joǵary, sebebi ol jańa geosaıası shynaıylyqty qurýǵa baǵyttalǵan jáne «Úsh dıalogty» jaqsartý qajettiligin bildiredi. Birinshiden, jahandyq deńgeıde AQSh, Reseı, Qytaı jáne Eýropalyq odaq arasynda konstrýktıvti dıalogty bastaý qajet.
Ekinshi dıalog Eýrazııa deńgeıinde Azııadaǵy ózara yqpaldastyq jáne senim sharalary jónindegi keńestiń jáne Eýropadaǵy qaýipsizdik jáne yntymaqtastyq uıymynyń áleýetterin biriktirý úshin qajet. Úshinshi dıalog - bul Eýrazııalyq ekonomıkalyq odaq, Eýropalyq odaq, Shanhaı yntymaqtastyq uıymy jáne Ońtústik-Shyǵys Azııa elderi qaýymdastyǵy arasyndaǵy júıeli ekonomıkalyq dıalog.
Bul bastamanyń syndarly qısyny bar - eger atalǵan barlyq elder men halyqaralyq uıymdar beıbitshilik pen qaýipsizdikke degen umtylystaryn kórsetse, onda olar barsha planetaǵa ortaq tapsyrmalardy sheshý úshin ózderiniń múmkindikteri men resýrstaryn biriktirýleri qajet. Mundaı tásil jańajahandyq dıalog jáne seriktestik arhıtektýrasyn jasaýdyń burynnan paıda bolǵan qajettiligin kórsetedi.
Óz baıandamasynda T. Shaımergenov sondaı-aq Beıjińde ótken «Bir beldeý, bir jol» Ekinshi forýmynyń qorytyndy kommıýnıkesine Elbasynyń jahandyq dıalogty damytýdyń qosymsha aqparattyq-kommýnıkatsııalyq quraly retinde sátti damyp kele jatqan G-GLOBAL ıdeıasynyń engenine nazar aýdardy.
QR Tuńǵysh Prezıdenti - Elbasy N.Nazarbaevtyń G-GLOBAL jobasy jáne QHR Tóraǵasy Sı Tszınpınniń «Bir beldeý, bir jol» bastamasynyń ıdeıalyq negizi retinde adamzat taǵdyrynyń birtutas qaýymdastyǵyn qurý kontseptsııasy birimen biriúndes. Eki ıdeıa da álem barlyq problemalardy birlese sheshýge, syn-tegeýrinderge birlese jaýap berýge, gúldenýge birlese umtylý qajet ekendigin bildiredi. N.Nazarbaev «Úsh D» jahandyq dıalog formatyn usyna otyra, barsha adamzatqa ózekti bolyp tabylatyn bul ıdeıalardy naqty josparda, tetikterde jáne iske asyrý algorıtmderinde tıimdi túsindirdi.
Qytaıdy zertteý ortalyǵy - Qytaı mádenıeti men tarıhyn zertteýmen, Qytaıdyń jahandyq «ekinshi» ekonomıka retinde bolashaq damýyn taldaýmen aınalysatyn zamanaýı qazaqstandyq taldaý ortalyǵy bolyp tabylady. Ol Qazaqstan Respýblıkasy men Qytaı Halyq Respýblıkasynyń isker toptary, sarapshy-akademııalyq qaýymdastyqtary jáne ýnıversıtetteri arasyndaǵy qatynastardy damytýǵa arnalǵan dıalogtyq alań.