Qytaıdan qomaqty somaǵa taýardy jasyryn jolmen ótkizbek bolǵandar anyqtaldy
«Jedel izdestirý sharalarynyń nátıjesinde kedendik deklaratsııalarynda ákelinetin salyq salynatyn taýarlardyń ornyna salyǵy az tólenetin taýarlary kórsetiletin shema belgilengen (jasyryn taýarlar). Aǵymdaǵy jylǵy 15 shildede Kedendik baqylaý komıteti Kontrabandaǵa qarsy kúres basqarmasynyń jedel áreket etetin mobıldik toby men Almaty oblysy boıynsha KBD qyzmetkerleri jedel aqparatty pysyqtaý sheńberinde Almaty oblysy Eńbekshiqazaq aýdanynyń Saımasaı kentinde ornalasqan óndiristik bazanyń aýmaǵynda QHR-dan júk mashınasymen ákelingen halyq tutynatyn taýarlardy zańsyz qaıta tıeý faktisin anyqtady», - dedi ol.
E.Jumanyń sózine qaraǵanda, kóliktiń shanaǵyn tekserý barysynda kedendik deklaratsııada kórsetilgen kafel men áınek maqtasynyń ornyna baǵasy qymbat turatyn halyq tutynatyn taýarlar anyqtaldy. Osy oraıda jalpy somasy 90 mln. teńgeden astam somaǵa kıim, planshet, saǵat, uıaly telefon men oǵan arnalǵan aksessýarlar jetkizilgeni belgili boldy.
«Qazirgi ýaqytta bul iske keden jáne basqa da quqyq qorǵaý organdary qyzmetkerleriniń qatystylyǵy tekserilýde. Atalǵan fakti boıynsha QR QK 209-baby 3-bóliginiń «b» tarmaǵy, ıaǵnı uıymdasqan toppen jasalǵan ekonomıkalyq kontrabanda boıynsha qylmystyq is qozǵaldy, tergeý amaldary júrgizilýde», - dedi ol.
