Qytaıdan kelgen qandasymyz «Qazaq daýysy» halyqaralyq án baıqaýynyń jeńimpazy atandy - VIDEO/FOTO
ASTANA. QazAqparat - Almatyda jarty jylǵa sozylǵan «Qazaq daýysy» halyqaralyq án baıqaýy óz máresine jetti. 220-ǵa jýyq ónerpaz qatysqan dodada Qytaıdan kelgen qandasymyz Janat Ádilhanqyzy men astanalyq Cáken Álimhanov teńdeı bas júlde ıegeri atandy.
Esterińizge sala keteıik, bul básekeni osydan jarty jyl buryn Qamshy.kz aqparattyq portaly uıymdastyrǵan bolatyn. Oǵan qazaq elinen ózge, Qytaı, Mońǵolııada turatyn ónerpazdar da belsene qatysty. Baq synaýshylardyń ishinde alty jasar búldirshin men jetpistegi qarııa da bar.
Baıqaýdyń birinshi kezeńi úmitkerlerge ınternet jelisinde daýys berý arqyly júrgizildi. Odan keıin eń kóp daýys jınaǵan úzdikterdi ádilqazylar alqasy baǵalap, jeńimpazdardy anyqtady. Bas júldege tigilgen bir mıllıon teńgeni Janat pen Sáken teńdeı bólisti. Al birinshi oryndy Eldos Jaqsylyqov ıelendi.
Uıymdastyrýshylar aldaǵy ýaqytta baıqaýdy jyl saıyn dástúrli túrde jalǵastyryp, aýqymyn keńeıtýdi kózdep otyr. Endi «Qazaq daýysy» jobasy úzdik ánshilerdi jeke-jeke sala boıynsha anyqtamaq.
Esterińizge sala keteıik, Qytaıdan kelgen qandasymyz Janat Ádilhanqyzy Ulttyq arnanyń «Qazaqstan daýysy» jobasy baıqaýynda da óz baǵyn synap, irikteý kezeńderinen súrinbeı ótip, qazir fınalǵa joldama alǵan úzdik tórt ánshiniń biri atandy.
21 jastaǵy jas ánshi mıllıardtar elinde de ár túrli baıqaýlarǵa qatysyp, júldeli oryndardan kórinipti. Ol Úrimjidegi «Shyńjań» telearnasynyń uıymdastyrǵan «Kúmis kómeı» án baıqaýynda fınalǵa deıin jetip, úzdik 10 ánshiniń biri atansa, ile-shala Qytaı Ortalyq telearnasynyń (CCTV) Beıjińde ótkizgen «Sharyqtasyn ánimiz» atty baıqaýda top jaryp, «Án patshasy» ataǵyna ıe bolady.
Ata-jurtyna arman qýyp kelgen qandasymyz Janat endi «Qazaqstan» ulttyq telearnasynda aldaǵy jeksenbi kúni ótetin «Qazaqstan daýysy» jobasynyń fınalynda óz ónerin ortaǵa salady. Sáttilik joldas bolsyn dep tileımiz.
Kúnsultan Otarbaı
