Qytaıdan kelgen qandas aqyn indetpen kúresip jatqan elge arnaý aıtty
Arnaýdyń vıdeosyn aqyn áleýmettik jelidegi paraqshasynda jarııalady.
«El barda er qor bolmas, er barda el qor bolmas» deıdi dana halqymyz. Dál qazirgi ólara jaǵdaıda elge de, el tizginin ustaǵan erge de aýyr synaqtar túsip tur. Judyryqtaı bolyp jumyla bilgen el ǵana bundaı náýbetti aman-esen jeńip shyǵary sózsiz. Birligimiz jaraspaı óz ishimizden qujyrasaq, onda bul jalǵan opa bermesi aıan. «Balapan basyna, turymtaı tusyna» tartpaı aýyz birligimizdi saqtap, qıyn-qystaý jaǵdaıdan óz elimizben birge ǵana shyǵa alamyz. Jat bireý kelip bizdi jyǵylǵan orynymyzdan turǵyzbaıdy. Eldigimizdiń týyn ustap, kóshin bastap kele jatqan prezıdent Qasym-Jomart Kemelulynyń bastaǵan kóshine senim bildirip, osy qyspaqtan elin aman alyp shyǵatynyna qoldaý kórsetsek qana halyq oılaǵan kún tezirek atar. El senimi aqtalar», - deıdi aqyn Facebook paraqshasynda.
Erlan Amanqojanyń jazýynsha osy bir kúrdeli kezeńde shetten kelgen qandastardyń atynan pana bolǵan otanymyzǵa bir aýyz rızashyǵyn jetkizý - azamattyq paryzy ekenin aıtady.
«Syn saǵattan súrinbeı ótip, beti jaman indetten tezirek aıyǵyp, elimiz tynysh, jurtymyz aman bolsa eken. Qazaǵymnyń el tizginin senip tapsyrǵan azamattary seniminen shyǵyp, úmitin aqtap, erteńimiz jarqyn bolsyn!» - deıdi ol.
Erlan Amanqojauly 1988 jyly 5 qarashada Qytaı Halyq Respýblıkasynyń Іle qazaq oblysy Muńǵulkúre aýdanynda dúnıege kelgen. 2004 jyldan bastap aıtysqa qatysqan. Aımaqtyq aıtysta 4 márte birinshi oryn, Іle qazaq avtonomııaly oblysynyń dástúrli aıtystarynda 2 márte bas júlde, Shyńjań ólkelik aıtysta 2 márte ekinshi oryndy, óziniń týǵan jeri Muńǵulkúre aýdanynda 12 márte bas júlde alǵan. 2017 jyly Atyraýda ótken Halyqaralyq aqyndar aıtysynda úshinshi oryndy, 2019 jyly Aqsýatta ótken Halyqaralyq aıtystyń bas júldesin enshilegen.
