Qytaıdan kelgen dárigerler Astanada 240 naýqas balany tekserdi (FOTO)
ASTANA. QazAqparat - «BI-Juldyzaı» qory Qytaı Halyq Respýblıkasynyń Sıan jáne Úrimji qalalarynan qytaı halyq medıtsınasymen mıdy emdeıtin aýrýhanynyń mamandaryn shaqyrtty. Maqsat - Astanada sal aýrýyna, júıke tamyrlary men mı aýrýlaryna shaldyqqan balalardy myqty dárigerlerdiń tekserýinen ótkizý.
Osylaısha, eki apta boıy balalardy qaraıtyn nevropatolog dárigerler men qytaı halqynyń em bolatyn massajyn ıgergen dárigerler naýqas balalardyń qasynda júrip, olardyń naqty qandaı emge muqtaj ekenin anyqtaǵan.
Igi sharany uıymdastyrýshylardyń aıtýynsha, «BI-Juldyzaı» qorynyń medıtsınalyq ortalyǵynda barlyǵy 240 bala Qytaıdan kelgen myqty dárigerlerden konsýltatsııa alǵan.
«Qazaqstannyń dárigerlerimen birge Qytaıdan kelgen mamandar naýqas balalardyń denesin shynyqtyrý, em bolatyn dene jattyǵýlaryn jasaý jáne ózge de saýyqtyrý sharalaryn ótkizdi. Mysaly, Sýn Hýdze degen dáriger Qytaıdaǵy myqty professor, aýrýhananyń dırektory jáne balalardy tekseretin óte myqty nevrapatolog dáriger. Ol Astanada júıke tamyrlaryna zııan kelgen balalardy tekserip, olardyń jazylýyna septigin tıgizetin aqyl-keńesterin aıtty»,-deıdi uıymdastyrýshylardyń biri.
Eń bastysy, sal aýrýyna shaldyqqan balalardy emdeý boıynsha medıtsınasy damyǵan qytaı dárigerleri osy 240 balanyń ata-anasyna naýqas sábıin úıde qalaı kútý kerektigin úıretti, deıdi «BI-Juldyzaı» medıtsına ortalyǵynyń mamandary.
