Qytaıdan Qazaqstanǵa iri kólemdegi kontrabanda úshin reseılik bes jylǵa deıin sottalýy múmkin

ASTANA. QazAqparat - Kedendik baqylaý komıteti Kontrabandaǵa qarsy kúres basqarmasynyń qyzmetkerleri Qytaı Halyq Respýblıkasynan kontrabandalyq taýarlar jetkizýdiń iri arnasynyń jolyn kesti. Bul týraly búgin Astanada ótken baspasóz máslıhatynda QR QM KBK Kontrabandaǵa qarsy kúres basqarmasy anyqtaý bóliminiń bastyǵy Erden Juma málim etti.

«Jedel-izdestirý sharalaryn júrgizý barysynda kontrabandalyq taýarlar jetkizýdiń turaqty arnasyn uıymdastyrǵan Reseı Federatsııasynyń 1969 jyly týylǵan A. esimdi azamaty belgili boldy»,-dedi ol.

Atap aıtqanda, retke keltirilgen keste boıynsha, taýarlar Qytaı Halyq Respýblıkasynan Qazaqstan Respýblıkasy azamattarynyń attaryna qurylǵan qazaqstandyq jaýapkershiligi shekteýli seriktestikterdiń mekenjaılaryna ákelinip, olardyń qyzmetin Reseı Federatsııasynyń atalǵan azamaty baqylap otyrǵan. Taýarlar Qazaqstan aýmaǵyna tómendetilgen kedendik qunmen jáne tasymaldanatyn taýarlar týraly durys emes málimetter kórsetilgen jalǵan qujattar negizinde jetkizilgen. Tasymaldanǵan taýarlardyń arasynda avtokólik saımandary, mata, kıim jáne ózge de zattar bar.

«Taýarlardyń jalpy kedendik quny 1 mlrd. teńgege jýyqtasa, tólenbegen kedendik tólemder men salyqtar somasy (zalal) - 318 mln. teńgeni qurady. Bul fakti boıynsha atalǵan azamatqa qatysty ekonomıkalyq kontrabanda faktisimen Qazaqstan Respýblıkasy Qylmystyq kodeksiniń 209-babynyń 2-bóliminiń «a,g,d»-tarmaqtary boıynsha (birneshe ret, asa iri mólsherde, adamdar tobynyń aldyn ala sóz baılasýymen) 3 qylmystyq is qozǵalyp, tergeý júrgizilýde», - dedi E. Juma.

Bul azamat ustalyp, sot sanktsııasymen oǵan qatysty «qamaý» túrindegi bultartpaý sharasy qoldanyldy. Kúdikti bes jylǵa deıin bas bostandyǵynan aıyrylýy múmkin.