Qytaıdan Qazaqstanǵa 5 tonna gýmanıtarlyq kómek keldi
QR Densaýlyq saqtaý vıtse-mınıstri Kamaljan Nadyrovtyń aıtýynsha, gýmanıtarlyq kómek túrinde jeke qorǵanys quraldary men naýqastardy emdeý úshin dárilik preparattar jetkizildi.
«Qytaıda epıdemııalyq jaǵdaı nasharlaǵanda Qazaqstan atynan gýmanıtarlyq kómek jiberilgen edi. Búgingi júk arasynda medıtsınalyq qurylǵylar joq. Bir rettik qorǵanys kıimi, medıtsınalyq maska, kózildirik syndy medıtsına mamandaryna qajet qorǵanys quraldary jetkizildi. Onyń jalpy salmaǵy 5 tonnadan asady», - dedi vıtse-mınıstr elorda áýejaıynda tilshilerge bergen suhbatynda.
Sonymen birge, Qytaıdyń Qazaqstandaǵy elshisi Chjan Sıao dástúrli dárilerdiń de jetkizilgenin aıtty.
«Dárigerler bortynan bólek, ekinshi ushaqta gýmanıtarlyq kómek jetkizildi. Onyń arasynda medıtsınalyq betperde, teplovızor, kózildirik, qolǵap jáne dástúrli qytaı dárileri bar. Jańa vırýsqa qarsy vaktsına men belsendi dáriler bolmaǵandyqtan, dál osy dástúrlik dáriler koronavırýspen kúreste kómek kórsetken edi», - dedi Chjan Sıao.
Elshiniń aıtýynsha, qytaılyq tarap taǵy da qosymsha gýmanıtarlyq kómek jiberýge daıyn.
Aıta keteıik, búgin Qytaıdyń Shyńjan-Uıǵyr avtonomdy aýdanynan 10 dáriger Qazaqstan astanasyna keldi. Olar koronavırýs ınfektsııasyn juqtyrǵandardy emdeý boıynsha tájirıbe almasady. Elshiniń aıtýynsha, Qytaıdyń medıtsınalyq brıgadalary búginde Pákistan, Italııa, Iran elderinde jumys istep jatyr. Qazaqstan - QHR dárigerleri barǵan TMD elderi arasyndaǵy jalǵyz memleket.