Qytaıdan qarjy tartý ońaı ma

ASTANA. QazAqparat - «Kazakh Invest» ulttyq kompanııasy Qazaqstan men Qytaıdyń birlesken jobalaryn qarjylandyrý problemalaryn jarııalady, dep xabarlaıdy QazAqparat tilshisi.

Tóraǵanyń orynbasary Marat Birimjanovtyń aıtýynsha, qarjy uıymdarynyń ortaq jobalarǵa qatysý kórsetkishi áli kúnge deıin tómen bolyp tur.

«Máselen, búginde Qazaqstanda Industrial and Commercial Bank of China (ICBC), China Development Bank (CDB) sııaqty qytaılyq bankter jumys isteıdi. Budan bólek, Altyn Bank bar. Onyń 60 protsentin CITIC Bank satyp aldy. Alaıda, atalǵan bankterdiń jarǵylyq kapıtaly kóp emes. Olar iri jobalardy qarjylandyra almaıdy. Tipti, kásiporyndardyń aınalma qarajatyn da tolyqtyrýǵa jaǵdaıy joq», - dedi M.Birimjanov Astanada ótken qazaq-qytaı bıznes forýmynda. 

Onyń aıtýynsha, Qytaıdan aqsha alǵanda qarjy uıymdary joǵary talap qoıady. Al aktsıonerler memlekettiń kepildigin suraıdy.

«Endi, ol jaqta ekonomıkada memlekettiń róli orasan. Sodan olar bizdegi jaǵdaı da sondaı dep oılaıdy. Sosyn sońǵy kezderi Qytaıdyń ishinde ıýandy dollarǵa aıyrbastaý qıyndap ketti. Negizi, Qazaqstanǵa aqsha salǵysy keletin qytaılyq kompanııalarda aqsha jaǵynan problema joq. Biraq onyń bári ıýanmen saqtalǵan. Osyǵan baılanysty ıýandy teńgege aıyrbastaýdyń tıimdi klırıngtik júıesin oılap tabýymyz qajet», - dep atap kórsetti M. Birimjanov.

Aıta keteıik, búgin Astanadaǵy «Rıksos» qonaq úıinde qazaq-qytaı bıznes forýmy bastaldy.

Qytaı Halyq Respýblıkasynyń kommertsııa jónindegi vıtse-mınıstri Jen Hýnbınniń aıtýynsha, Qazaqstan men Qytaı saýda-sattyqty dollarsyz júrgizýdi kózdeıdi.