«Qytaıdan - qant, ózbekten - órik, qyrǵyzdan - kamzol, sonda óz ónimiń qaıda, qazaq?» - respýblıkalyq basylymdarǵa sholý

Keshe Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaev Reseı Federatsııasyna resmı saparmen keldi. Qanat Saýdabaev reseılik mınıstrmen kezdesý barysynda eki el arasyndaǵy áriptestik máselelerin sóz etti. Tolyǵyraq «Egemen Qazaqstan» basylymynyń búgingi sanyndaǵy «Tatý kórshilerdiń syndarly áriptestigi» degen taqyryppen berilgen maqaladan oqı alasyzdar.

Osy taqyryptaǵy maqalany «Aıqyn» gazetiniń  búgingi sanynan da oqýǵa bolady.

Jahan jyrynyń jaryq juldyzy Lı Bonyń talaıly taǵdyry ejelgi qazaq jerimen tamyrlas ekenin aıtatyn gazet maqalasynyń keltirgen ýájderi Qytaı elinde ótken ǵasyrdyń 60 - shy jyldarynda talas arqaýy retinde kóterilgen  ony aqyry «ortaazııalyq túrik áýletinen» degen tııanaq jasalǵanyn sol eldegi qazaq qalamgeri rastap otyrǵany kim-kimniń de kóńilin bir kóterip tastaıtyny sózsiz. «Egemen Qazaqstan» basylymynyń búgingi sanynda jaryq kórgen «Kim qanǵa qyzbaıdy?» degen taqyryppen berilgen maqalada Qytaı mádenıetindegi bizge qatysty basqa da qyzyqty jaılar qamtylypty.

***

Keler jyly Qazaqstan men qos slavıan eli arasynda kúshine minetin Keden odaǵy elimizge qymbatshylyq ákelmek», - dep jazdy «Aıqyn» gazetiniń  búgingi sany. Bul jaıynda tolyǵyraq bilgińiz kelse «Keden odaǵy elimizge qymbatshylyq ákele me?» degen saýalǵa qurylǵan maqalaǵa kóz júgirtińiz.

«Qazir qyz bitken qaı jerden uzatylady? Árıne, toıhana, meıramhana, kafelerden ketedi. Artynda kóńili bosaǵan ata-ana, qımas aǵaıyn kóz jastaryn syǵyp, úrpıisip qala beredi. Talaı toıdan keıingi kórinis bul. Osy úrdis bizge qaıdan keldi?» -dep jazǵan atalmysh basylymdaǵy kelesi maqala «Qazaq qyzyn qalaı uzatady?» degen taqyryppen erteden qaımaǵy buzylmaǵan salt-dástúrimizdiń búgingi kóńilge oı salar keleńsizdikterine nazar aýdarypty.

Arnaıy tapsyryspen jasalǵan «Qazaq eliniń» tórinen oryn alýǵa tıis Kereı men Jánibek handardyń beıneleri jasalǵan eskertkishtyń kereksiz bolyp qalǵandyǵyn bárimiz bilemiz. «Aıqyn» gazetiniń  «Rýhanııat» betinen oryn alǵan  «Asyqqan saıtannyń isi» taqyrybyndaǵy maqalaosy jetilmegen jobadan shyqqan shýdyń jaı-japsarymen tanystyrypty.

***

Qazaqstandyq kásipkerliktiń  jaı-kúıi, damý deńgeıi - alda turǵan mindetter. Osy jáne ózge de tolǵaqty máseleler qarasha aıynyń 20-synda Almaty qalasynda ótetin alqaly quryltaıda talqylanady. «Altyn orda» aptalyǵynda jaryq kórgen «Otandyq bıznes: fılosofııa qalyptastyrmaıynsha, is ónbeıdi» taqyrybymen berilgen suhbat «Básekege qabilettilik yqpal etetin faktorlar» atty halyqaralyq sharanyń mańyzyna toqtalypty.

Sondaı -aq atalmysh basylymnyń búgingi sanynda jaryq kórgen  professor  Qulbek Ergóbektiń «Aqıyq aqyn, jaýhar jyr» degen taqyryptaǵy maqalasy  aqyn Ábdilda Tájibaıulyna arnalypty. 

«Qytaıdan - qant, ózbekten - órik, qyrǵyzdan - kamzol sonda, óz ónimiń qaıda, qazaq?» Osylaı qyzyq ta qasiretti saýalǵa qurylǵan«Altyn orda» aptalyǵyndaǵy  kelesi maqala otandyq ónim óndirisi men kásiporyndardy qoldaý máselesine nazar aýdarypty.

«Qarashanyń 27-sine úsh eldiń memleket basshylarynyń biryńǵaı kedendik kodekske qol qoıýy josparlanýda. Al parlamentterdegi ratıfıkatsııalaýdan keıin ol 2010 jyldyń shilde aıynyń 1-inen kúshine enbek» dep jazady kedendik odaq taqyrybyn qozǵaǵan «Kazahstanskaıa pravda» gazeti. 

Bul taqyrypty«Ekspress K», «Lıter»gazetteri de jalǵastyrǵan.

«Ekspress K» gazeti sondaı-aq Saıası sheshimder ınstıtýty qarashada júrgizgen statıstıkalyq zertteýler qazaqstandyqtardyń kóńil-kúıinde bir jyl burynǵyǵa qaraǵanda oń ózgerister bolǵanyn anyqtady dep jazady búgingi nómirinde.

Shylym shegýge arnalǵan arnaıy oryndarda ár shylym shegýshi úshin qarastyrylǵan oryn 4 sharshy metr bolýy tıis. Osy máselege nazar aýdarǵan «Lıter» basylymy dámhanalar men meıramhanalar úshin shylym shegýshilerge arnalǵan   bólmeler qymbatqa túsetinin jazady. Gazettiń keltirgen málimetterine qaraǵanda, memlekettik sanıtarlyq qadaǵalaý erejelerine sáıkes, ár adamǵa tórt sharshy metrge qosa, otqa tózimdi materıaldar, jeke kúlsalǵyshtar men aýa sorǵyshtar qajet kórinedi.