Qytaıdan dene qyzýymen kelgen 61 qazaqstandyq aýrýhanadan shyǵaryldy
«6 qańtardan bastap, búginge deıin Qazaqstanǵa Qytaı memlekettik shekara pýnktteri arqyly 30 394 adam keldi. 6 qańtardan 4 aqpanǵa deıin Densaýlyq saqtaý mınıstrligi mamandary Qytaımen memlekettik shekara arqyly ótetin áýejaılar men temirjol beketterinde 21 838 adamdy, onyń ishinde 20 084 jolaýshy men 1 814 ekıpaj múshelerin tekserdi. 29 jolaýshydan dene qyzýy men JRVI belgileri anyqtaldy. Olardyń 28-i aýrýhanaǵa jatqyzyldy», - dedi Dıas Ahmetshárip Qazmedıa ortalyǵynda ótken brıfıngte.
Qazirgi ýaqytta poıyzdardyń qozǵalysy, áýe qatynasy jáne Qytaımen jeńil avtokólik tasymaly toqtatyldy. Medıtsınalyq uıymdar turǵylyqty jeri boıynsha Qytaıdan kelgen azamattardyń densaýlyǵyn baqylaýdy jalǵastyryp otyr.
«5 aqpanǵa deıin JRVI belgileri bar 104 adam aýrýhanaǵa jatqyzyldy, 71 adam aýrýhanadan shyǵaryldy. 33 patsıent statsıonarda qaldy. Naýqastardyń jaǵdaıy jaqsy. Koronavırýs anyqtalǵan joq. Barlyq aýrýhanadan alynǵan synamalar qosymsha baqylaý úshin Almatydaǵy Ulttyq ǵylymı erekshe juqpaly aýrýlar ortalyǵyna jiberiledi. Bul ortalyq jańa koronavırýsty Polımerazdy tizbekti reaktsııa ádistemesin meńgergen», - dedi D. Ahmetshárip.
Álem boıynsha, jańa koronavırýs saldarynan qaza tapqandar sany búgin 490-ǵa jetti.