Qytaıdan Almatyǵa 1 mln dollardyń medıtsınalyq buıymdary jetkizildi
ALMATY.QazAqparat – Almatyǵa mıllıon dollardyń medıtsınalyq zattary tıelgen arnaıy bort qondy. Covid-19-ben kúresip jatqandarǵa arnalǵan buıymdar qaladaǵy emhana men aýrýhanalarǵa taratylady, dep habarlaıdy QazAqparat tilshisi.
Qytaıdan on eki tonna joǵary synypty qorǵanys maskalary, respıratorlar, kózildirikter, qaıta paıdalanýǵa bolatyn Dupont qorǵanys kostıýmderi, ınfraqyzyl termometrler satyp alyndy. Bul buıymdar koronavırýspen kúresip jatqan qaladaǵy medıtsına, polıtsııa, áskerı qyzmetkerler men shuǵyl qyzmetterdiń qajettilikteri úshin jetkizildi.
«Jeke qorǵanys quraldary tapshy boldy. Pandemııa kezinde dál osy taýarlarǵa suranys joǵarylaǵan. Sondyqtan, Shanhaıdan Almatyǵa taýarlardy jetkizýdi uıymdastyrý ońaı bolǵan joq. Biz QR Syrtqy ister mınıstrligine, Qytaı Elshiligine jáne QHR-daǵy Qazaqstan Elshiligine alǵysymyzdy bildiremiz», - dep atap ótti uıymdastyrýshylar.
Jeke qorǵanys quraldaryn satyp alý men jetkizýdi qazaqstandyq kásipkerler júzege asyrdy. Atap aıtar bolsaq, Evgenıı Feld, Asqar Alshynbaev, Esenǵalı Baımenov, Nurjan Bekshenov, Raıymbek Batalov.
Almatyǵa 320 myń maska, 6,4 myń respırator, 7 myń kózildirik, 12,2 myń Dupont qorǵanys kostıýmderi, 440 myń qolǵap, 3,16 myń ınfraqyzyl termometr ákelindi. Bul taýarlar eýropalyq sapa sertıfıkattaryna ıe.
