Qytaıdan 150-den astam adam jetkiziledi - Muhtar Tileýberdi
«Medıtsınalyq qolǵaptar (1 mln dana) jáne maskalar (500 myń dana) túrinde Qytaıǵa gýmanıtarlyq kómek kórsetý máselesi pysyqtaldy.
Koronavırýstyń taralý epıtsentri bolyp tabylatyn Ýhan qalasynan 83 qazaqstandyq azamatty evakýatsııalaý máselesi kelisildi jáne qamtamasyz etildi. Sonymen qatar, dıplomatııalyq arnalar arqyly túsken ótinishterge sáıkes, EAEO elderiniń 24 azamatyn (18-i Qyrǵyzstan, 5-i Belarýs jáne 1-i Armenııa) evakýatsııalaýǵa kómek kórsetildi. Nur-Sultan q. kelgennen keıin Bishkekke qaıtarylǵan Qyrǵyzstan azamattarynan basqalarynyń barlyǵy karantınge ornalastyryldy», - dedi mınıstr.
Sonymen qatar vedomstvo basshysy 12 aqpanda Qazaqstanǵa jetkiziletin adamdar týraly aıtty.
«Qytaı tarapymen qol jetkizilgen ýaǵdalastyqtarǵa sáıkes, búgin tańerteń 217 Qazaqstan azamaty «Eır-Astana» áýekompanııasynyń ushaǵymen Nur-Sultan qalasyna jetkizildi, al 155 qazaqstandyq 12 aqpanda qaıtarylady dep josparlanyp otyr», - dedi M. Tileýberdi.
Onyń aıtýynsha, bıylǵy 10 jáne 12 aqpandaǵy evakýatsııadan keıin Qytaı aýmaǵynda Qazaqstanǵa qaıtýdan bas tartqan 343 Qazaqstan azamaty, onyń ishinde bizdiń sheteldegi mekemelerdiń qyzmetkerleri men otbasy músheleri qalady.
«QR Elshiligi QHR Bilim mınıstrligi jáne joǵary oqý oryndarymen birlesip, qazaqstandyqtardy qajetti medıtsınalyq jabdyqtarmen, tamaqpen qamtamasyz etýdi júzege asyrýda. QR Syrtqy ister mınıstrligi men onyń QHR-daǵy barlyq sheteldik mekemelerinde Qazaqstan azamattaryna keńes berý úshin jedel jeliler quryldy», - dedi mınıstr.
Budan buryn habarlanǵandaı, Úkimet otyrysynda QR Densaýlyq saqtaý mınıstri Eljan Birtanov Qytaı astanasy Beıjińnen Qazaqstannyń 217 azamaty evakýatsııalanǵanyn aıtty.
