Qytaıdaǵy joıqyn jarylystyń shyǵyndary 400 mln dollardan asyp ketýi múmkin - Qazaqstandyq saqtandyrý kompanııasy (FOTO)
ALMATY. QazAqparat - 12 tamyzda Qytaıdyń Tıantszın qalasynda oryn alǵan joıqyn jarylystyń shyǵyndary 400 mln dollardan asyp ketýi múmkin. Bul týraly qazaqstandyq saqtandyrý kompanııasynyń baspasóz qyzmeti habarlady.
Tıantszın - Qytaıdaǵy avtomobıldi ımporttaıtyn eń iri porttardyń biri. Beıjińnen 96 shaqyrym qashyqtyqta ornalasqan. 15 mln halqy bar.
Qazirgi tańda álemdik saqtandyrý kompanııalary tehnogendik apattyń shyǵyndaryn eseptep jatyr. Ázirge shyǵyn kólemi 400 mln AQSh dollary kóleminde bolýy múmkin degen boljam bar.
Aldyn-ala aqpar boıynsha, qoımalardyń birinde iri kólemdegi jarylǵysh zat iske qosylyp ketken. Jarylys qymbat markaly avtokontsernniń 4000 kóligin jaramsyz etken. Olardyń shyǵyny 50 mln AQSh dollaryn qurap otyr.
Jarylys tolqyny port múlki men teńiz júkterin, janyp ketken qoımalardaǵy múlikterdi jaramsyz etti. Keltirilgen shyǵyn kólemi $ 344 mln dep baǵalanyp otyr.
Beıresmı aqparat kózderine sensek, 50-ge tarta adam qaza bolyp, 700 adam aýyr jaralanǵan. Qytaıdyń seısmologııalyq ortalyǵy habarlaǵandaı, birinshi jarylystyń kúshi trotıl ekvıvalentinde 3 tonna bolsa, ekinshisiniń kúshi 21 tonna bolǵan.
Saqtandyrý naryǵynda mundaı úlken tólem 2011 jyldyń 11 shildesinde Kıprde bolǵan apatqa tólengen edi.
Sol kezde qazaqstandyq kompanııa $3,6 mln kóleminde ótemaqy tóledi.
«Qazir bizdiń saqtandyrý kompanııasy tolyq esepti kútip otyr. Biz ózimizge belgilengen mindettemelerdi tolyǵymen óteımiz», - dedi saqtandyrý kompanııasynyń ókilderi.
Aıta keteıik, sársenbi kúni jergilikti ýaqyt boıynsha saǵat 23:30-da qalanyń ónerkásip aımaǵynda tolqyny birneshe shaqyrym jerde sezilgen kúshti jarylys boldy. Shamamen jarty mınýttan soń ekinshisi oryn alǵan.
