Qytaıdaǵy jetekshi qazaq kompanııalary medıa salasynyń bolashaǵyn talqylady
«Jańa dáýir - jańa medıa» taqyrybymen ótken shaǵyn forýmdy Shynjań teleradıo toraby (Qazaqstandyq iD TV - tsıfrlik televıdenıesiniń qytaılyq nusqasy) JShS qazaq bóliminiń «Baýyrsaq medıa» jobasy men Eljaý mádenıet jáne kommýnıkatsııa JShS (Shanhaı) birlesip uıymdastyrdy.
Forýmǵa «Kýábol» JShS dırektory Yqylas Orazbaıuly, «Jas Qyran» JShS dırektory Arystanbek Nuqanuly jáne Qytaı Ortalyq televızııasynyń Shyńjańdaǵy turaqty tilshisi Senim qatysyp, jastarǵa qazaq tildi aqparat salasynyń damýy, bolashaǵy jáne naryqqa baǵyttalýy jóninde pikirlerimen bólisti.
Sharaǵa Úrimji qalasynda bilim alyp jatqan qazaq stýdentteri jáne ár salada eńbek etip júrgen qazaq jastary qatysty.
Qytaıdyń ár jerinde bilim izdep júrgen qazaq jastaryna, sondaı-aq, ózge ulttarǵa qazaq mádenıetin, tarıhyn jáne dástúrin nasıhattap júrgen Eljaý mádenıet jáne kommýnıkatsııa JShS dırektory Ernur Jumaǵalıuly bul sharany Qytaıdyń Beıjiń, Shanhaı jáne Gýanchjoý sekildi ózge de qalalarynda ótkizýdi josparlap otyrǵanyn jetkizdi.
Aıta keteıik, 20 myń saǵattyq qazaq tilindegi kıno qory bar «Bawrsak tv» ulttyq qosymshasyn paıdalanýshylar sany bul kúnde mıllıonnan asqan. Oǵan qazaqsha telearna baǵdarlamalary, qazaq tiline aýdarylyp dýblıaj jasalǵan sheteldik kınofılmder men serıaldar, sondaı-aq, «Qazaqstan juldyzdary» aıdarymen aqyndar aıtysy vıdeolary júktelgen.
