Qytaıdaǵy jarystyń alǵashqy kúninde qazaq balýandary júldesiz qaldy
ASTANA. QazAQparat - Keshe Qytaıdyń Hoh-Hoto qalasynda dzıýdodan álemdik Gran prı týrnıri bastaldy. Ókinishke qaraı jarystyń alǵashqy kúni synǵa túsken balýandarymyz júldege ilige almady, dep habarlaıdy QazAqparat tilshisi.
Týrnırdyń birinshi kúni el namysyn 60 kelige deıingi salmaqta eki dzıýdoshymyz qorǵady. Onyń biri Rýstam Ibraev bolsa, ekinshisi Baýyrjan Jaýyntaev.
Ibraev alǵashqy beldesýinde soltústikkoreıalyq Kım Chýong Hýokty utty. Alaıda, ekinshi aınalymda Albert Ogýzovka jeńilip qaldy. Biraq, qarsylasy fınalǵa shyqqany úshin ol jubanysh beldesýi arqyly qola júldege talasýǵa múmkindik aldy. Ókinishke qaraı jubanysh beldesýinde Mohammad Rashnenozadqa ese jiberip, júldesiz qaldy.
Al Jaýyntaev birinshi beldesýinde qarsylasyna ese jiberip, jarys jolynan shyǵyp qaldy.
Búgin Qazaqstan boz kilemge erler arasynda 73 kelige deıingi salmaqta Aıdyn Dartaev pen Bekádil Shaımerdenov jáne 81 kelide Ersultan Muzapparov shyqsa, áıelder arasynda 63 kelige deıingi salmaqta Dilbar Ómirálıeva, 70 kelide Zere Bektasqyzy el namysyn qorǵaıdy.
Aıta keteıik, Gran Prıge Qazaqstannan 10 dzıýdoshy attanǵan bolatyn.
Olar:
Erler:
1. Rýstam Ibraev (60 kg)
2. Baýyrjan Jaýyntaev (60 kg)
3. Bekádil Shaımerdenov (73 kg)
4. Aıdyn Dartaev (73 kg)
5. Ersultan Muzapparov (81 kg)
6. Dáýlethan Jaqypov (90 kg)
7. Ádil Orazbaev (+100 kg)
8. Jambyl Turǵynalıev (+100 kg)
Áıelder:
1. Dilbar Ómirálıeva (63 kg)
2. Zere Bektasqyzy (70 kg)
Jarys jeńimpazdary men júldegerleri erteń belgili bolady.
