Qytaıdaǵy jarylystar: Polıtsııa kúdiktini atady
ASTANA. QazAqparat - Qytaı polıtsııasy sársenbi kúni eldiń ońtústigindegi Lıýchjoý okrýginde bolǵan 15 jarylysty uıymdastyrýǵa kúdiktini atady, dep habarlady Bı-bı-sı-diń orys qyzmeti.
Jańa habarlarǵa qaraǵanda, jarylys saldarynan jeti adam mert boldy, 50-den astam adam jaraqattandy, ekeýi iz-túzsiz ketti.
QHR qoǵamdyq qaýipsizdik mınıstrliginiń habarlaýynsha, jarylystar týraly is qylmys retinde qaralýda, kúdikti lańkestikke aıyptalyp otyrǵan joq.
Jarylys týraly is boıynsha Dapý aýylynyń turǵyny, tegi Veı degen 33 jastaǵy er adam ustaldy. Basqa eshteńe aıtylmaǵan. Qylmystyń sebepteri de aıtylǵan joq.
«Qoǵamdyq qaýipsizdik organdary bar kúsh-jigerin jumsap, isti tergeýde», - delingen mınıstrliktiń málimdemesinde.
Úkimettik Sınhýa agenttiginiń habarlaýynsha, kúndizgi saǵat úsh pen bestiń arasynda Lıýchjoý shaǵyn qalasy men onyń aınalasynda 15 jarylys boldy. Jergilikti aýrýhana, qalalyq bazarlar, saýda ortalyǵy, avtobýs stansasy jáne birneshe úkimettik ǵımarattar, sonyń ishinde túrme men sheneýnikter jataqhanasy zaqymdalǵan. Polıtsııanyń aldyn ala boljamdary boıynsha, bomba meken-jaılarǵa sálemdeme retinde jiberilip, «shuǵyl jetkizý» dep tapsyrys berilgen.
Sársenbi kúni áleýmettik jelilerde oqıǵa ornynan kóptegen fotosýretter jarııalandy. Sýretterde tútindep jatqan úıindiler jáne qıraǵan kósheler kórinedi.
