Qytaıdaǵy jarylys saldarynan qaza tapqandardyń sany 50 adamǵa jetti
ASTANA. QazAqparat - Tıantszın qalasyndaǵy qaýipti zattar bolǵan qoımadaǵy jarylys saldarynan mert bolǵan jáne japa shekkenderdiń sany artýda: qazir 50 adamnyń qaza tapqany jáne 701 adamnyń jaraqattanǵany (olardyń 71-niń jaǵdaıy aýyr), taǵy 21 iz-túzsiz joǵaldy dep esepteletini belgili.
RIA Novostı habarlaǵandaı, sársenbi kúni Bınhaı aýdanynda Ruihai Logistics logıstıkalyq kompanııa qoımasynda jergilikti ýaqytpen saǵat 23.30 arasy 30 sekýndtaı bolatyn eki jarylys oryn alǵan. Jarylystyń kúshti bolǵany sonshalyq, ony tipti jergilikti seısmologııalyq qyzmet tirkegen. Olardyń qýattylyǵy trotıl ekvıvalentinde 3 jáne 21 tonnany qurady. Jarylystan keıin órt shyqty. BAQ málimetterine qaraǵanda onyń aýmaǵy shamamen 20 myń sharshy metrdi qurady. Tótenshe jaǵdaı sebebi ázirge belgisiz, alaıda BAQ-tyń habarlaýynsha, oǵan Ruihai Logistics logıstıkalyq kompanııasynyń qaýipsizdik júıesindegi olqylyqtar sebep bolýy múmkin. Onyń bastyǵy ustaldy.
«Tıantszındegi jarylys qurbandarynyń sany 50 adamǵa jetti», - delingen Sınhýa agenttiginiń habarlamasynda. Osyǵan deıin agenttik bılikke silteme jasap, kem degende 21 adam iz-túzsiz joǵaldy dep esepteletinin habarlaǵan. Olardyń ishinde órt sóndirýshiler de bar.
CCTV telearnasynyń habarlaýynsha, japa shekkenderdiń kóbi kompanııa mańyndaǵy úılerdiń turǵyndary. Japa shekkenderdiń ishinde oqıǵa orny mańynda kólikte bolǵandar da bar.
