Qytaıdaǵy jarylys: birneshe adam ajal qushty
ASTANA. 27 jeltoqsan. QazAqparat - Qytaıdyń Sychýan provıntsııasyndaǵy Lýchjoý qalasynda 26 jeltoqsan kúni saýda ortalyqtarynyń birinde iri jarylys boldy. Jarylystan tórt adam qaza tapty, ondaǵan adam jaraqattandy, dep habarlaıdy jergilikti BAQ.
TJ 22:40 shamasynda avtobýs stansasynyń janynda ornalasqan saýda ortalyǵynyń birinshi qabatynda oryn alǵan. Jarylys saldarynan ǵımarattyń bir bóligi qulap, onyń synyqtary tipti avtobýs aıaldamasy men dúken janynda turǵan kólikterdi basyp qaldy.
Kýágerlerdiń aıtýynsha, jarylys bolǵan birinshi ǵımaratta órt bastalyp, ol tez arada ekinshi qabat pen shatyrǵa qaraı jaıylǵan. Jaraqattanǵan 22 adam jergilikti medıtsına kolledjiniń aýrýhanasyna, al taǵy 15 adam basqa medıtsınalyq mekemege jatqyzyldy. Zardap shekkenderdiń arasynda SO-nyń qyzmetkerleri men kelýshiler, sol mańnan ótip bara jatqandar bar.
Aboluowang basylymynyń málimetinshe, jarylystyń oryn alýyna gazdyń syrtqa jaıylýy sebep bolýy múmkin. Osyǵan deıin jaqynda ornalasqan ózge dúken ıeleri men jergilikti turǵyndar gaz qubyrynyń durys jumys istemeıtinine shaǵymdanǵan bolatyn.
