Qytaıdaǵy Tarbaǵataı jerinde Ulys kúnine arnalǵan kontsert ótti
ASTANA. QazAqparat - QHR Shyńjań uıǵyr avtonomııalyq ólkesiniń Dórbiljin aýdanynda turatyn qandastarymyz Naýryz merekesine arnap aýqymdy óner keshin ótkizdi. Bul týraly qytaıdyń kazak.ts.cn (Táńir taý) saıty habarlaıdy.
Tarlan Tarbaǵataıdaǵy qasıetti Emil ózeniniń jaǵasyna jaıǵasqan Dórbiljin aýdany - uzaq tarıhtan beri qazaq ultynyń qutty qonysy, qara ordasy bolyp kele jatqan, tamyr tartqan ata mekeni. Sol berekeli jerde jańa bir kóktemniń samaly esip, samarqannyń kók tasy jibip, qys qyrynan aman shyqqan irgeli el naýryz merekesin dýmandy sharamen qarsy aldy.
Osy Dórbiljin aýdanynyń taýyq jylǵy naýryz merekesine arnaǵan saltanatty óner keshiniń bastalý sátinde Dórbiljin aýdanynyń ákimi Maqsutqan Jámsápuly kópshilikti naýryz merekesimen quttyqtady. «Naýryz merekesi - ultymyzdyń ári baýyrlas ulttardyń dástúrli merekesi. Jyl basy, kóktem merekesi, týys-týǵan, jora-joldastar bas qosyp, berekeli dastarhan basyna jılyp, bereke-birliktiń tuǵyryn bekemdeı túsetin, jańa tirliktiń bastalǵan kúni. Naýryz merekesi birlikti, tatýlyqty dáripteıtin ultymyzdyń dástúrli merekesi», - dep atap ótti.
Merekelik kontsert aýdandyq óner ujymy daıyndaǵan «Naýryz keldi» toptyq bıimen bastaldy. Kesh barysynda halyq ánderi, qazaqtyń kóne saq-túrkiden kele jatqan kúrkireme-kómeı áýeni áýelep, baldyrǵan bıshilerdiń «Qamshy» bıi, kórermenderdi kúlkige bólegen ázil, qulaq quryshyn qandyratyn kúmbirli kúıler oryndaldy. Osylaısha naýryz merekesine arnalǵan dýmandy óner toıy óz saltanatymen jarasym taýyp, halyqqa merekelik kóńil kúı syılaǵan kesh boldy. 
