Qytaıdaǵy soǵys kemesinde jumys istegen qazaq boıjetkeni - Sheteldegi qazaq baspasózi
Shanduń soǵys kemesinde jumys istegen qazaq boıjetkeni- «Jenmın jıbao»
«Shanduń soǵys kemesindegi áskerı boıjetken, qandaı ádemi». Apta sońynda qytaılyq basylymdarda osyndaı taqyryptaǵy aqparat jaryq kórdi.
2017 jyly 27 sáýir kúni Qytaıdyń alǵashqy otandyq áskerı avıamatkasynda (áskerı ushaqtardy ushyratyn keme) Shanduń soǵys kemesi teńizge túsirildi. Atalǵan soǵys kemesindegi alǵashqy toptaǵy áıel - Gúlzıra esimdi qazaq qyzy áskerı retinde kemeniń tuńǵysh áskerı jattyǵýyna kýá boldy. Keıinnen áskerı mindetten bosaý aldynda da ol soǵys kemesinen ushaqtardyń ushqan sátin óz kózimen kórý baqytyna ıe boldy, dep habarlaıdy qytaılyq «Jenmın jıbao» aqparattyq portaly.
Shyńjańnan kelgen Gúlzıra esimdi qazaq qyzy - bıyl 24 jasta. Qazir Dalııan ulttar ýnıversıtetinde oqıdy. Gúlzıra 2019 jyly ýnıversıtette oqyp júrgende áskerı mindetin óteý mártebesine ıe bolǵan. Sóıtip, ol 2020 jyly maýsym aıynda Shanduń soǵys kemesine kelip, atalǵan kemedegi alǵashqy toptaǵy áıel áskerlerdiń biri atanady.
Sol jyly Shanduń soǵys kemesi tuńǵysh ret shynaıy oqpen atylǵan jattyǵýyn jasaǵan kezde Gúlzıra áserli sáttiń kýágeri bolady.
«Alyp soǵys kemesine jańa ǵana kelgen kezde áskerı jattyǵýdy tikeleı kózimmen kórgenim úshin ózimdi baqytty jaýynger sezinemin. Knopkany óz qolymmen baspaǵanymmen, sol sáttiń tiri kýágeri bolýym men úshin eshqashan esten ketpes sáttiń biri boldy», - deıdi ol.
Qytaılyq basylymnyń dereginshe, onyń áskerdegi jumys orny kemeniń astyńǵy qabatynda bolǵandyqtan, ádette tek kemege tıelgen ushaqtyń daýysyn ǵana estıtin. Soǵys ushaǵynyń ushyp-qonǵan kezdegi sátin kúndelikti kóre almaıtyn edi. Gúlzıra áskerı mindetin aıaqtaýǵa jaqyndaǵan kezde, bitirýshi jaýynger retinde soǵys kemesindegi ushaqtardyń ushyp-qonǵanyn qaıtadan kórgen. Bul qazaq qyzy úshin este qalarlyq sátterdiń biri edi.
«Ol Shanduń soǵys kemesinde mindet ótegenin maqtanysh tutady jáne kóptegen stýdentterdiń de ózi sekildi áskerı qosynǵa barýyn tileıdi», dep túıindeıdi qytaılyq BAQ.
Qara sabynmen sharýasyn shalqytqan Látıpa Jákenqyzy –CNR
Látıpa Jákenqyzy esimdi qazaq áıeli qara sabyn jasaý arqyly otbasylyq kirisin arttyryp otyr. Látıpa 23 jasynan bastap qara sabyn daıyndaýdy úırene bastaıdy. Alǵashynda tek otbasyna qajettilik úshin jasaǵan.
Atalǵan aqparat kóziniń keltirgen deregine súıensek, Látıpa Jákenqyzy 2010 jyly aýylynan kıim tigý dúkenin ashady. Keıinnen qara sabyn jasap, satyp qosymsha kiris kirgizýdi qolǵa alady. Ol qaınatylǵan bir qazan tabıǵı materıaldan 12 qara sabyn daıyndaýǵa bolatynyn, jylyna 500-den artyq qara sabyn jasap, 20 myń ıýan (1 300 000 teńge kóleminde – avt.) kiris kirgizetinin aıtady.
Onyń aıtýynsha, qara sabyn jasaý óneri anasynan ózine jalǵasqan eken.
Ádette sheshesi qyzyna nemese enesi kelinine úıretip, muraǵattaıdy. Ol kishkentaıynan ájesi men sheshesiniń qara sabyn jasaǵanyn kórip, kómektesip ósken. Ol ýaqytta zamannyń tapshylyq kezeńi bolǵandyqtan, bul ónerdi ıgergen ájesi men sheshesi eshkimnen aqy almaı, qara sabyndy tegin bergen. Látıpanyń aıtýynsha, bul - qazaqı bereke men yntymaqtyń, adamgershiliktiń belgisi.
«Zamannyń damýyna, adamdardyń ózgerýine baılanysty qazir osy ónerdi biletinder barǵan saıyn azaıyp barady. Qara sabyn jasaý - ultymyzdyń ejelden kele jatqan dástúrli óneriniń bir túri. Ony umytýymyzǵa bolmaıdy. Eger qara sabyndy jasaýdy úırenýge qyzyǵatyndar bolsa, men úıretýge daıynmyn», - deıdi L. Jákenqyzy.
Aıta keteıik, qazaq halqy qara sabyndy alabota, sarybalaq sekildi dárilik ósimdikterdiń kúlin paıdalanyp, belgili mólsherde maldyń maıyn aralastyryp qaınatyp jasaıdy. Mundaı sabynnyń qyzamyqty jazý, qaıyzǵaqty ketirý, qyshymany basý, balalardyń bórtpesin ketirý qatarly emdik rólderi bar.
Dastan Orazbekovtiń jeke kontserti ótedi – «Kaznews»
Mamyr aıynyń basynda Qazaq elinen kópshilikke belgili «Orda» tobynyń ánshisi, akter, áıgili «Qazaqstan daýysy» shoýynyń tálimgeri Dastan Orazbekov jeke shyǵarmashylyq kontsertin ótkizbekshi, dep habarlaıdy «Kaznews».
«Kópten kútken kesh Ólgıı qalasynda mamyr aıynyń 3, 4-kúnderi Qurmanhan atyndaǵy mýzykalyq drama teatrynda eki ret, al mamyr aıynyń 6-kúni Ulanbatyr qalasynda Zaısan Hıll saraıynda bir ret ótedi», dep jazady «Kaznews».
Mońǵolııalyq basylymnyń dereginshe, Dastan Orazbekov gastroldik saparynda óziniń tyńdarmandaryna kontsert berip qana qoımaı, erekshe syı daıyndapty. Atap aıtsaq, Baıan-Ólgıı Aımaǵynda ótetin kontsertinde jankúıerlerimen kezdesý uıymdastyrmaq. Óziniń shynaıy fanattarynyń lebizin tyńdap, syrlasyp ári birge án oryndamaq.
Sondaı-aq, osy aptada «Kaznews» aqparattyq portalynda «Baıanólgıılik jasóspirimder fýtzaldan el birinshiligine qatysty» degen taqyryptaǵy aqparat jaryq kórdi.
Fýtzaldan el birinshiligine 11, 12 jastaǵy sportshy jasóspirimder qatysqan.
Sáýirdiń 10-23 kúnderi el astanasy Ulanbatyr qalasynda fýtzaldan «Grossroots» respýblıkalyq chempıonat ótti. Bul týraly Baıan-Ólgıı aımaǵynyń Fýtzal federatsııasynyń jattyqtyrýshysy Hamıt Toılatuly habarlaǵan.
Jarysqa eldiń túkpir-túkpirinen 1400-den joǵary sportshy qatysyp shyn myqtyny anyqtady. Baıan-Ólgıı aımaǵynan 11 jáne 12 jastaǵy sportshylar atalǵan dodaǵa qatysyp, óz ónerlerin ortaǵa salǵan.
Mońǵolııalyq basylymnyń dereginshe, 11 jastaǵylardan 26 komanda, 12 jastaǵylardan 32 komanda jarysqa qatysty.
«Baıan-Ólgıı fýtzal komandasy jattyqtyrýshysynyń aıtýy boıynsha, aldy 6 aı, arty 2 aı ǵana jattyqqan jas sportshylar bolsa da eldiń tarıhy tereń azýly klýbtaryna qarsy keremet óner kórsetken», dep jazdy «Kaznews».
Sıanda Qytaı men Ortalyq Azııa Syrtqy ister mınıstrleriniń tórtinshi kezdesýi ótti –People.cn
Qytaı men Ortalyq Azııa Syrtqy ister mınıstrleriniń tórtinshi kezdesýi 27 sáýir kúni tańerteń Shensı ólkesiniń Sıan qalasynda ótti, dep habarlaıdy Qytaıdyń «People.cn» aqparattyq portaly.
Qytaılyq BAQ-tyń málimetinshe, 2022 jyldyń maýsymynda Qytaı men Ortalyq Azııa Syrtqy ister mınıstrleriniń úshinshi kezdesýi barysynda barlyq tarap Qytaı jáne Ortalyq Azııa memleketteri basshylarynyń kezdesý tetigin qurýǵa kelisken bolatyn.
Qatysýshy elder aldaǵy Qytaıda ótetin sammıtti uıymdastyrý, Qytaı men Ortalyq Azııanyń túrli salalaryndaǵy yntymaqtastyq, sondaı-aq ortaq nazar aýdaratyn halyqaralyq jáne óńirlik máseleler boıynsha pikir almasqan.
«Kezdesýden keıin Qytaıdyń Syrtqy ister mınıstri Tsın Gan taraptar kelesi aıda Sıan qalasynda Qytaı-Ortalyq Azııa sammıtin ótkizýge kelisti dep málimdedi», dep jazdy qytaılyq BAQ.
Túrkııa-Qazaqstan Dostyq saıabaǵy ashyldy– «TRT»
Anadolynyń bas qalasy Ankaranyń Mamak aýdanynda Túrkııa-Qazaqstan dostyq saıabaǵy qyzmetke berildi.
Saıabaqtyń ashylý saltanatyna Qazaqstan Respýblıkasy Parlamenti Májilisiniń tóraǵasy Erlan Qoshanov pen Túrkııa Uly Ulttyq Májilisiniń tóraǵasy Mustafa Shentop qatysty. Sonymen birge Qazaqstannan kelgen óner toby, qazaqstandyq stýdentter, aýdannyń jurtshlyǵy da keldi.
Bul týraly osy aptada Túrkııa Radıo Televızııa portaly da habarlaǵan bolatyn.
Túrkııalyq BAQ-tyń dereginshe, eki eldiń dostyǵy men baýyrlastyǵynyń belgisi bolatyn saıabaq 14 myń sharshy metr alańdy quraıdy. Jasyl jelken alańda júgirý jáne velosıped joldary, arnaıy jattyǵý alańdary, balalar oıyn alańy ornalasqan. 16 túrki memleketiniń sanyna oraı arnaýly 16 samaljaı oılastyrylǵan. Shatyrlary baıraǵymyzben tústes boıalǵan. Saıabaq aýmaǵynda Kúltegin-Tonykók eskertkishteri, Hakim Abaı men uly fılosof ál-Farabıdiń de bıýsti oryn alǵan.
Sondaı-aq, osy aptada «TRT»-da «Ibrahım Kúlshimbaev «Erligi úshin» medalimen marapattaldy» degen taqyryptaǵy aqparat jaryq kórdi.
Túrkııalyq basylymnyń dereginshe, Qazaqstan Tótenshe jaǵdaılar mınıstriniń birinshi orynbasary Ibrahım Kúlshimbaev «Erligi úshin» memlekettik medalimen marapattaldy. Atalǵan syılyqty Túrkııa prezıdenti Rejep Taıyp Erdoǵan Prezıdenttik saraıda ótken saltanatty jıynda tabys etken.
Aıta keteıik, Túrkııa Prezıdenttik saraıynda 2023 jyldyń 6 aqpanynda Túrkııada bolǵan joıqyn jer silkinisinde izdeý-qutqarý jumystaryna qatysqan azamattardy marapattaý rásimi ótti. Saltanatty sharaǵa 80-nen astam elden kelgen ókilder qatysqan.
Iran men Qazaqstan arasyndaǵy taýar aınalymy 20 paıyzǵa ósti – «Parstoday»
Irannyń kedendik statıstıkasy Iran men Qazaqstan arasyndaǵy taýar aınalymynyń 20 paıyzǵa óskenin kórsetedi. Iran men Qazaqstan arasyndaǵy saýda ótken jyly 320 mıllıon dollardan asty, bul ótken jylmen salystyrǵanda 20 paıyzǵa joǵary, dep habarlaıdy «Parstoday» aqparat agenttigi.
Irandyq BAQ-tyń deregi boıynsha, bıylǵy jyly Qazaqstannan Iranǵa shamamen 124 mıllıon 801 myń dollardy quraǵan 275 myń tonnadan astam taýar ákelinip, ótken jylmen salystyrǵanda quny 59 paıyzǵa, salmaǵy boıynsha 25 paıyzǵa artqan.
Aıta ketý kerek, bıdaı, arpa, jartylaı tirkemelerge arnalǵan jol traktorlary, kúnbaǵys maıy men maqsary maıy, tek syǵymdalatyn porshendi qozǵaltqyshy bar traktorlar(dızel nemese jartylaı dızel) Qazaqstannan Iranǵa ákelinetin negizgi taýarlar boldy.
Azız Abdýhakımov Qazaqstannyń Ekologııa jáne tabıǵı resýrstar mınıstrimen kezdesti - «ÓzA»
27 sáýirde Tabıǵı resýrstar mınıstri Azız Abdýhakımov pen Qazaqstan Respýblıkasynyń Ekologııa jáne tabıǵı resýrstar mınıstri Zúlfııa Súleımenovanyń kezdesýi ótti.
Bul týraly apta sońynda «ÓzA» aqparattyq agenttigi habarlady.
Ózbekstandyq basylymnyń málimetinshe, kezdesýde qorshaǵan ortanyń monıtorıngi, bıologııalyq ártúrlilik pen tabıǵı aýmaqtardy qorǵaý, klımattyń ózgerýiniń saldaryn azaıtý, qatty turmystyq qaldyqtardy basqarý, kadrlyq áleýetti arttyrý men ǵylymı-tehnıkalyq salalardaǵy yntymaqtastyq máseleleri talqylanǵan.
Aıta keteıik, 2022 jyldyń jeltoqsanynda Ózbekstan Respýblıkasynyń Úkimeti men Qazaqstan Respýblıkasynyń Úkimeti arasynda qorshaǵan ortany qorǵaý týraly kelisimge qol qoıylǵan. Kelissózder barysynda atalǵan kelisim aıasynda túrli baǵyttaǵy yntymaqtastyqty tereńdetý jáne keńeıtý týraly kelisimderge qol jetkizildi.
