Qytaıdaǵy quryltaıǵa 300-den astam qazaqstandyq stýdent jınaldy

BEIJІŃ-HANChJOÝ. QazAqparat - 2017 jyldyń 16-17 maýsymynda Hanchjoý qalasynda Qytaıdaǵy qazaqstandyq stýdentter qaýymdastyǵynyń (KSAC) 7-shi quryltaıy ótti, dep habarlaıdy Qytaıdaǵy «QazAqparat» HAA menshikti tilshisi.

Osy forýmǵa Qytaıdyń 16 qalasynan 300-den astam qazaqstandyq stýdent qatysty. Quryltaı aıasynda «Qazaqstandyq stýdentter qaýymdastyǵynyń jastar ómirindegi róli» konferentsııasy ótti. Konferentsııada Shanhaıdaǵy QR Bas konsýly Joshyhan Qyraýbaev, QHR-daǵy QR Elshiliginiń bilim berý jáne mádenıet jónindegi keńesshisi Qaırat Ábdrahmanov, Azııa men Okeanııadaǵy QR BǴM Halyqaralyq baǵdarlamalar ortalyǵynyń ókili Berik Súleımenov, Hanchjoý ekonomıka jáne qarjy ýnıversıtetiniń prorektory Hýan Tszıansın sóz sóıledi.

Qazaqstandyq dıplomattar stýdentterge Qazaqstan Prezıdentiniń jáne Úkimetiniń bastamalary týraly, olardy júzege asyrý barysy týraly aıtyp berdi. Stýdenttik uıymdy odan ári jetildirý boıynsha josparlar men pikirlerdi talqyǵa salyp, stýdentterdi akademııalyq jáne ǵylymı jetistikterin arttyrýǵa, bizdiń halqymyzdyń dástúrleri men mádenıetterin belsendi túrde nasıhattaýǵa shaqyrdy.

Quryltaıdyń qorytyndysy boıynsha memorandýmǵa jáne KSAC jalpy jarǵysyna qol qoıyldy. Sondaı-aq, Qazaqstannyń ınvestıtsııalyq jobalary men syrtqy saýda qyzmetine qatysatyn jáne qazaqstandyq stýdentterdi taǵylymdamadan ótkizýge jáne jumysqa qabyldaýǵa daıyn qytaılyq kompanııa ókilderiniń qatysýymen dóńgelek ústel ótti.

Quryltaıdyń resmı bólimi aıaqtalǵannan keıin stýdentter álemdegi iri Alibaba elektrondyq kommertsııalyq kompanııasynyń keńsesine bardy.