Qytaıdaǵy quryltaıǵa 250-den astam qazaqstandyq stýdent qatysty
«Qazaqstannyń ekonomıkalyq-áleýmettik damýyna jastardyń qosatyn úlesi» atty quryltaı taqyrybyn talqylaýǵa Qytaıdyń 17 qalasynda oqıtyn 250-den astam stýdent qatysty. Onyń teń jartysy Qytaı astanasynda oqysa, qalǵan jartysy Shanhaı, Nankın, Sıan, Hanchjoý, Dalıan, Ýhan, Chýntsın, Chanchjoý, Sýchjoý, Chjentszıan, Gýanchjoý, Úrimshi, Harbın, Taııýan, Tıantszın, Lanchjoý qalalarynda bilim alyp jatyr.
Quryltaıdyń ashylý saltanatynda Qazaqstan elshisi Shahrat Nuryshev, Qytaı munaı ýnıversıtetiniń prorektory Ý Sıaolın, KSAC uıymynyń tóraıymy Nurgúl Makulbek sóz sóıledi.
«Elshilik Qytaıda oqyǵan jastardyń tálimgerlikten ótip, oqýdan keıin jumysqa ornalasýyna basa mán beredi. Byltyrdan beri Qazaqstanda ınvestıtsııalyq jobalardy iske asyrýshy qytaılyq kompanııalarmen birlesip, «bos oryndar jármeńkesin» ótkizýdi qolǵa aldyq. «Nurly jol» jańa ekonomıkalyq saıasaty men Jibek joly ekonomıkalyq beldeýiniń qıylysy aıasynda bizdiń elde 55 kásiporyn ashylyp, 27 mlrd dollar ınvestıtsııa quıyldy. Bul bolashaqta 20 myńnan astam jumys ornyn ashýǵa múmkindik beredi. Atalmysh jumys oryndarynyń kóbi qytaı tilin bilýdi qajet etetini anyq», - dedi Qazaqstan elshisi.
Ol sondaı-aq, Qytaıdyń sheteldegi kásiporyndardy damytý qaýymdastyǵymen (CODA - China Overseas Development Association) birge «bos oryndar jármeńkesin» uıymdastyrý tájirıbesi dástúrli sharaǵa aınalady degen úmit bildirdi.
«Búgingi quryltaı aıasynda ótken «jármeńkeniń» arqasynda jastar tálimgerlikten ótip, jumysqa ornalasýǵa múmkindik alady», - dedi Shahrat Nuryshev.
Saltanatty shara barysynda Shahrat Nuryshev qaýymdastyqtyń jumysyna belsendi atsalysqan Aqqalbek Taǵabergenovke (Hanchjoý), Nurtas Isabekke (Shanhaı), Aıan Úsipálige (Tıantszın), Tımýr Kósherbaevqa (Nankın), Erkin Dálelhanǵa (Lanchjoý), Ádilhan Dúısembaevqa, Azıza Leskenge, Ásel Qojaǵulǵa, Jansaıa Tokıshevaǵa, Saltanat Dospanovaǵa jáne Dáýlet Jaqsybekke (Beıjiń) gramota tabystady.
Aıta ketsek, Qytaıdaǵy qazaqstandyq stýdentterdiń quryltaıyn ótkizý Qazaqstannyń Qytaıdaǵy Elshiligi men QR bilim jáne ǵylym mınıstrliginiń halyqaralyq baǵdarlamalar ortalyǵynyń bastamasymen jolǵa qoıylǵan. «Kazakhstan Students Association in China» (KSAC) degen aty bar qaýymdastyq 2013 jylǵy ekinshi Quryltaıda qurylǵan bolatyn. Qazir onyń quramyna 10 myń qazaqstandyq stýdent kiredi. Ótken jyly atalmysh quryltaı Hanchjoý qalasynda ótti.