Qytaıdaǵy koronavırýs: Bokstan irikteý týrnıriniń merzimi men orny ózgerdi
«Halyqaralyq Olımpıada komıtetiniń boks boıynsha jumys toby men Qytaıdyń Olımpıadalyq komıteti Ýhandaǵy koronavırýs ınfektsııasynyń taralýyn jiti qadaǵalaýda. Sportshylar men resmı tulǵalardyń qaýipsizdigin qamtamasyz etý maqsatynda 3-14 aqpan aralyǵyna josparlanǵan 2020 jylǵy Tokıo Olımpıadasyna Azııa/Tynyq muhıty elderiniń boksshylaryn irikteýdi keıinge qaldyrý sheshimi qabyldanǵan bolatyn. Іrikteý týrnıri ótkiziletin jańa merzim – 3-11 naýryz. Qazirgi kezde jarysty ótkizetin oryn qarastyrylýda. Bir anyǵy, týrnır Qytaıda uıymdastyrylmaıdy. Jumys toby týrnırdi qabyldaıtyn memleket pen qalany anyqtaǵan kezde barlyq Ulttyq Olımpıadalyq komıtetter, ulttyq federatsııalar men resmı tulǵalar habardar etiledi», - delingen HOK-tyń resmı hatynda.
Osylaısha, bokstan Tokıo Olımpıadasyna alǵashqy irikteý týrnıri 20-29 aqpan aralyǵynda Afrıkanyń batysyndaǵy Senegal elinde ótedi. Sebebi Ýhannan keıingi kvalıfıkatsııalyq jarys dál osy elde ótetini josparlanǵan bolatyn.