Qytaıdaǵy kórmede Dımashtyń kontsertine bıletter utysqa qoıyldy

ASTANA. QazAqparat - Beıjiń qalasynda ótip jatqan China Outbound Travel Market-2018 kórmesinde Qazaqstan brendiniń resmı ashylý saltanaty boldy, dep habarlaıdy «QazAqparat» HAA tilshisi «Kazakh Tourism» UK» AQ-qa silteme jasap.

Kórmede Qazaqstannyń ulttyq stendi ekotýrızm, etnotýrızm, City break, MICE týrızm, shopıng, tranzıttik týrlar sııaqty Qazaqstannyń týrızm salasyndaǵy qyrýar múmkindikteri týraly aıtylady.

Kazakh Tourism kompanııasy uıymdastyrǵan ulttyq stendtiń ózegi áıgili ánshi Dımash Qudaıbergenniń súgireti turǵan fotozona boldy. Onda ánshiniń Shenchjen qalasynda ótetin kontsertine bılet utyp alýǵa bolady.

Kórmege Qazaqstannyń Qytaı naryǵyna beıimdelgen 12 týroperatory qatysyp jatyr. Berlındegi kórmede jıylǵan jurttyń kózaıymy bolǵan Arlan teatrynyń batyr akterleri mádenı baǵdarlamany usyndy.

Qazaqstan stendiniń ashylý rásimine QR-dyń Qytaıdaǵy Tótenshe jáne ókiletti elshisi Shahrat Nuryshev qatysty.