Qytaıdaǵy kómir shahtasynda bolǵan órtten 24 adam qaza boldy
ASTANA. QazAqparat - Búgin tańerteń erte Qytaıdyń soltústik-shyǵysyndaǵy Lıaonın provıntsııasynda Fýsın ken óndirýshi kontsernine jatatyn «Henda» ken óndirýshi kompanııasynyń shahtasynda bolǵan órtten 24 adam qaza taýyp, 52-si jaraqattandy.
Bul týraly Sınhýa agenttigi habarlady.
Belgili bolǵandaı, 26 qarasha kúni «Henda» kompanııasyna jaqyn jerdegi kenishte saǵat 1:31 kezinde magnıtýdasy 1,6 bolǵan jer silkinisi oryn aldy. Onyń artynsha kompanııanyń jer asty shtreginde apat boldy. Aldyn ala zertteý málimetteri boıynsha, kómir tutanǵan. Apat saldarynan 89 jumysshynyń 24-i ajal qushyp, 52-si jaraqattandy.
Qazir oqıǵa ornynda jedel qutqarý sharasy aıaqtaldy. Jaraqattanǵandar aýrýhanaǵa jetkizildi. Kompanııanyń barlyq shahtalarynda jumys toqtatyldy, qaýipsizdikti tekserý jumystary júrgizilýde.
