Qytaıdaǵy qazaqtardyń dinı kózqarasyna, salt-dástúrine erkindik berilgen - Zo Fyń
«Qytaıda dinge sený, senbeý árkimniń óz erkinde. Kim qandaı dinge senedi, qandaı dinı sharalarǵa qatysady, barlyǵyna eshqandaı shekteý joq. Búginde Shyńjańda 23 mıllıonnan astam adam ómir súredi. Sonyń ishinde 10 mıllıondaı halyq ıslam dinin ustanady. Shyńjańda 24 myńnan astam meshit bar. Islam dini boıynsha dinı qyzmetkerler 29 myńnan asady. Bul kórsetkish ıslam memleketterinde kóp kezdese bermeıdi. Musylmandardyń Qajylyqqa barýy da ashyq jolǵa qoıylǵan. Qazir Shyńjańda ár jyly 3800-deı adam Mekkege baryp paryzyn óteıdi. Memleket tarapynan olardy medıtsınalyq baqylaýǵa, uıymdastyrý sharalaryna arnaıy qarjy bólinedi. Bul Saýd Arabııasy Koroldigi men Qytaı eliniń arnaıy kelsimderi arqyly júzege asyp otyr», - dep atap ótti Zo Fyń.
Onyń aıtýynsha Qytaı memleketi Islam dini men terrorızmdi eshqashan baılanystyrmaıdy.
«Qytaıda mekteptegi balalarǵa, jasóspirimderge arnalǵan arnaıy zań bar. olardyń qaýipsizdigine, alańsyz bilim alýyna dinı sharalar kedergi bolmaýy kerek. Memleketimiz qalypty dinı sharalar men terrorızmdi bólip qaraıdy. Islam dini men terrorızmdi eshqashan baılanystyrǵan emes. Bul turǵyda kózqarasymyz Qazaqstannyń ustanyp otyrǵan saıasatymen birdeı dep sanaımyz. Terrorızm álemge qaýip tóndiredi. Qoǵamnyń tynyshtyǵyn buzady. Beıkúná adamdardyń jazyqsyz ólimin eshkim qoldamaıdy. Biz álemdik uıymdarmen birge terrorızmge úzildi-kesildi qarsymyz», -deıdi QHR memlekettik keńesi, adam quqyqtary jónindegi mekemesiniń orynbasar baqylaýshysy Zo Fyń.
Sonymen birge ol Qytaıdaǵy qandastarymyzdyń turmys-tirshiligin tilge tıek etti.
«Men qazaqtar qonystanǵan aımaqtarda kóp jumys jasadym. Ol jaqta qazaqtar baı-baqytty turmys ótkizip jatyr dep aıta alamyn. Ózge ult ókilderi sekildi olardyń salt-dástúriniń órkendeýine, dinı senimine barlyq múmkindikter berilgen»,- deıdi ol.
