Qytaıdaǵy qazaqtar «Qarajorǵa» úshin qyrǵyzdarmen «qyrylysyp» jatyr
ASTANA. 21 qarasha. QazAqparat - Qyrǵyzdardyń "bıge talasy" jaıynda qytaıdaǵy baýyrlarymyz «Sen qazaq» saıty arqyly «Qazaqstandaǵy el aǵalarynyń nazaryna» degen taqyrypta maqala jarııalapty.
Talaı ǵasyrlardy basynan ótkergen, tamyry tereń bul murany jańǵyrtqan qytaıdaǵy qandastarymyz edi. 13 000 adam bir jerde, bir ýaqytta bılep gınnes rekorttar kitabyna engizgen de solar.
Qazaqtyń qolyna jibi túzý birdeńe ilikse ıesi bar bop shyǵa keletin bir bále jabysypty, dep jazady kazaitys.kz. Shubatyn anaý, qymyzyn mynaý patenttep, kókparyn bireý taqymdaǵysy kelip, qaradaı talasyp, tartyp alǵysy kelip ary ótken, beri ótkenniń bári tepekteıdi. Qudaıǵa shúkir, namysty azamattarymyzdyń arqasynda "Kókpardan tuńǵysh Azııa Birinshiligin" Astanada ótkizip ony óz atymyzǵa jazdyrǵandaı bolyp edik. Endi qyrǵyzdar "qarajorǵa" bıine talasyp jatyr. Talaspaǵan ne qaldy ózi? Áı osy qyrǵyzdar Talas ózenin de bizben talasyp júrip tartyp alǵan-aý...
Alaıda qyrǵyzdyń jeke kásipkeri Bolat Dıqanbaev: «Bul bıdi qytaıdaǵy qyrǵyz baýyrlarymyz jalǵastyryp kele jatqan eken, sodan qytaıdaǵy qazaqtar alyp bılep júr», - dep dálelsiz pátýa aıtypty. "Solaı dep bir qazaq aıtty" dep dálel keltirmekke tyrysqanyn qaıtersiń. Tómendegi beınematerııalda taǵy sol qyrǵyz "qarajorǵanyń" sózi jaıynda suraǵan tilshige: "Qara jorǵanyń sózi burynnan el arasynda kele jatqan sóz eken, ony qazaqtar aýdaryp alǵan" degenge saıdyrypty. Joq. Bul bıde buryn sóz bolmaǵan. Keıin oǵan sóz jazyp óleńdetken Mereı Turdaqyn degen 30-dar shamasyndaǵy aqyn jigit. Úrimjide turady. Qyrǵyzdyń dáıeksiz sózin osydan-aq ańǵara berýge bolady.
Sonymen, Qytaıdaǵy qazaqtar "qarajorǵa" úshin qyrǵyzdarmen saıt betinde "qyrylysyp" jatyr. Myńdaǵan pikirler jazyldy. Buǵan siz ne deısiz?
