Qytaıdaǵy qazaqstandyq stýdentterdi qandaı máseleler mazalaıdy
BEIJІŃ. QazAqparat - 2016 jyldyń 23 jeltoqsanynda Qazaqstannyń Qytaıdaǵy Elshisi Shahrat Nuryshev Qytaıdaǵy Qazaqstan stýdentteriniń qaýymdastyǵy ókilderimen (KSAC), Beıjiń qalasynda bilim alyp jatqan doktoranttar jáne magıstranttarmen jyldy qorytyndylaý maqsatynda dástúrli kezdesý ótkizdi, dep habarlaıdy «QazAqparat» HAA-nyń Qytaıdaǵy tilshisi.
Qytaıdaǵy Qazaqstan stýdentter birlestigin mazalaıtyn mańyzdy jáne ózekti máseleler tóńireginde: daryndy jáne bilimdi túlekterdiń jumysqa ornalasýy, Qytaı kásiporyndary men QHR aýmaǵyndaǵy QR mekemelerinde tájirıbeden ótý, Beıjiń shet tilder ýnıversıtetindegi «Qazaqstan Ortalyǵy» qyzmetiniń mańyzy jáne t.b. týraly erkin túrde pikir almasty.
Sh.Nuryshev qazaqstandyq stýdentterdiń belsendi qatysýymen QR Táýelsizidiginiń 25 jyldyǵyna oraı Beıjiń, Úrimji, Sıan jáne Shanhaı qalalarynda is-sharalar uıymdastyrylǵanyn atap ótti. Ol 2016 jyldyń mamyr aıynda Chýntsın qalasynda ótken 5-shi Qytaıdaǵy qazaqstandyq stýdentterdiń quryltaıyna oń baǵa berdi. Bul quryltaıǵa Beıjiń, Shanhaı, Ýhan, Sıan, Úrimji, Lanchjoý, Nankın, Tıantszın, Shenıan jáne Gýanchjoý qalalarynda bilim alyp jatqan 100-den astam stýdent qatysqan.
Elshi qazaqstandyq stýdentterdiń elimizdiń oń ımıdjin qalyptastyrýdaǵy, «100 naqty qadam» memlekettik baǵdarlamasy, «Máńgilik el» jalpyulttyq ıdeıasy, «Nurly jol» jańa ekonomıkalyq saıasaty men onyń «Bir beldeý, bir jol» qytaılyq bastamasyn damytýda mańyzdy ról oınaıtynyn atap ótti.
Shahrat Nuryshev stýdentterdi «EKSPO-2017» halyqaralyq mamandandyrylǵan kórmesi men stýdentterdiń qysqy 2017-Ýnıversıadasyna, sonymen qatar Qazaqstandaǵy Qytaı týrızmi jyly aıasynda eriktiler qozǵalysyna atsalysýǵa shaqyrdy. Elshi belsendi stýdentterdi alǵys hattarmen marapattady.
Eske sala keteıik, qazirgi tańda Qytaı aýmaǵynda bakalavr, magıstratýra, doktorantýra men tildik taǵylymdamalarda 11 myńnan astam qazaqstandyq bilim alýda.
