Qytaıdaǵy qazaq jazýshysy Ábdenbaı Bajaı qaıtys boldy
ASTANA. QazAqparat - 25 qańtar kúni belgili jazýshy, aqyn, synshy Ábdenbaı Bajaı Qabaıuly 80 jasqa qaraǵan shaǵynda Qytaı Halyq Respýblıkasy Shyńjań ólkesiniń ortalyǵy Úrimji qalasynda dúnıeden ozdy, dep habarlaıdy QazAqparat.
Ábdenbaı Bajaı 1939 jyly QHR Shyńjań ólkesi Altaı aımaǵynda dúnıege kelgen. 1959 jyly Úrimji qalasyndaǵy Shyńjań til ınstıtýtynyń Qytaı tili jáne ádebıeti fakýltetinde oqyǵan. Ábdenbaı Bajaı sanaly ǵumyrynda shyǵarmashylyqpen qatar, oqytýshy, «Altaı» gazetiniń redaktory, Shyńjań ólkesindegi Jazýshylar odaǵynyń qazaq tilinde jaryq kóretin «Shuǵyla» jýrnalynda bas redaktordyń orynbasary sekildi qoǵamdyq jumystardy atqarǵan. Ol Іle Qazaq avtonomııalyq oblysynyń Jazýshylar qoǵamy tóraǵasynyń orynbasary, Qytaı jazýshylar qoǵamynyń múshesi, «Memlekettik birinshi dárejeli jazýshy» ataǵynyń ıegeri boldy.
«Súrleý», «Taý bulaǵy», «Bógeý bermes», «Aqıqat izdegen adam» jyr jınaqtarynyń jáne «Kún óz keýdeńnen týady», «Jasampazdyq orbıtasy», «Ádebıet jáne tanym» kitaptarynyń avtory. Shyǵarmalary qytaı, uıǵyr, qyrǵyz tilderine aýdarylǵan. Sonymen birge aqyn óleńderi «Qazaq ádebıeti», «Juldyz» sekildi Qazaqstanda shyǵatyn basylymdarda jaryq kórip, oqyrmandarmen qaýyshqan.
