Qytaıdaǵy «Qazaq jaýyngeri» WBC tujyrymy boıynsha Azııa chempıony atandy
ASTANA. QazAqparat - 23 jastaǵy qytaıdaǵy qazaq boksshysy Elshat Nyǵmatollauly (14-0-1, 5KO) kezekti jekpe-jeginde jeńiske jetti, dep habarlaıdy QazAqparat tilshisi.
«Qazaq jaýyngeri» laqap atymen sharshy alańǵa kóterilip júrgen qandasymyz, 14 jekpe-jeginde jeńilip kórmegen fılıppındik boksshy Konrado Tanamormen (10-0-0, 4KO) WBC ABCO tujyrymy boıynsha jeńil salmaqta (53,5 kelige deıin - 118 fýnt) Azııa chempıony tıtýlyna talasty.
10 raýndtqa josparlanǵan jekpe-jek 3 raýndtyń ortasynda aıaqtaldy. Elshat qarsylasyn 3 ret nokdaýnǵa túsirip, tóreshi aıqasty toqtatty.
«Jalpy fılıppındik boksshylar tózimdi keledi. Qarsylasym buǵan deıingilerdiń ishindegi eń myqtysy boldy desem bolady. Ol álemge tanymal Mennı Pakıaonyń bazasynda jattyǵady jáne eshqashan jeńilip kórmegen. Týra baǵyttalǵan bir aýyr soqqym jeńiske jetýime kómegin tıgizdi» ,- deıdi Elshat QazAqparat tilshisine bergen suhbatynda.
Aıta keteıik, Elshat Nyǵmatollauly buǵan deıin WBO tujyrymy boıynsha Qytaı chempıony beldigin jeńip alǵan bolatyn.
